Սիրիայի ավերակների մեջ շողում է հույսի թույլ շող՝ գրում է Մեծ բրիտանիայի նախկին վարչապետ, ներկայումս կրթության հարցերով ՄԱԿ-ի հանձնակատար Գորդոն Բրաունը The Washington Post-ում:
Սիրիայում հակամարտությունը հրահրել է աշխարհում փախստականների խոշորագույն հոսքը 1945թ. սկսած: Կրկին գրանցվեցին պոլիոմելիտով հիվանդանալու դեպքեր, կա պարենամթերքի, մաքուր ջրի, դեղորայքի պակաս: Սակայն առաջացել է ծրագիր, որը թույլ կտա հաշված օրերի ընթացքում կազմակերպել 400 հազար սիրիացի փախստական երեխաների ուսումը՝ գրում է Բրաունը:
6.5 միլիոն սիրիացիների շուրջ կեսը, որոնք ստիպված են եղել լքել իրենց տները, երեխաներ են: Չորս տարի առաջ Սիրիան մոտ էր համընդհանուր կրթության ապահովմանը, այժմ ռմբակոծված, հրկիզված կամ ուղղակի փակ են հազարավոր դպրոցներ: Սիրիայից դուրս է եկել ընդհանուր առմամբ 2 միլիոն փախստական: Որոշ երջանիկներ քաղաքական ապաստան են գտել, օրինակ, Շվեդիայում: Շուրջ 1 միլիոն փախստական սիրիացիներ գտնվում են Լիբանանում, որոնցից 400 հազարը դպրոցական տարիքի երեխաներ են:
Բրաունը նշում է, որ յուրաքանչյուր բաց թողնված օր, ամիս և տարի խիստ նվազեցնում է հավանականությունը, որ սիրիացի փախստական երեխաները երբևիցե ուսում կստանան:
ՅՈՒՆԻՍԵՖ-ը և փախստականների գործերով ՄԱԿ-ի վարչությունը Լիբանանի կառավարության հետ համատեղ մշակել են ծրագիր. դպրոցներում ստեղծել երկրորդ հերթափոխ: Տարեկան պահանջվում է 196 միլիոն դոլար, որպեսզի Լիբանանում բնակվող 400 հազար սիրիացի երեխաները տեղ ստանան դպրոցում կամ քոլեջում:
Այս ծրագիրը կապահովի կայունություն և կօգնի երեխաներին ապրել նորմալ կյանքով՝ կարծում է Բրաունը:
133 տարի առաջ Կարմիր խաչը սահմանեց պատերազմի ժամանակ բժշկական օգնության սկզբունքը: 40 տարի առաջ «Բժիշկներ առանց սահմանների» ասոցիացիան հռչակեց, որ ճգնաժամի հետևանքով տուժածները պետք է ունենան բժշկական օգնության հասանելիություն:
«Իսկ այժմ թող գա կրթության հերթը, որպեսզի երեխաներն ունենան կրթվելու հասանելիություն՝ անկախ պետական սահմաններից»,- գրել է Բրաունը և հիշեցրել, որ ընդհանուր առմամբ շուրջ 22 միլիոն փախստական երեխաներ զրկված են ուսում ստանալու իրավունքից:
