Միջազգային և Քուվեյթի ոչ կառավարական կազմակերպությունները Սիրիային խոստացել են 400 մլն դոլարի չափով մարդասիրական օգնություն ցուցաբերել: Այս մասին Քուվեյթի մայրաքաղաքում հայտնել է Համաշխարհային բարեգործական իսլամական կազմակերպությունը՝ փոխանցում է ITAR-TASS-ը:
Սիրիացի փախստականներին աջակցություն ցուցաբերող ոչ պետական հիմնադրամների ներկայացուցիչների հանդիպումը կայացել է Սիրիայի դոնոր-երկրների համաժողովի նախաշեմին: Այն կանցկացվի Ալ-Քուվեյթում՝ ՄԱԿ-ի գլխավոր քարտուղար Պան Գի Մունի հովանու ներքո երկրորդ անգամ: Միջոցառման նպատակն է 6.5 մլրդ դոլար հավաքելը:
Քուվեյթի ոչ կառավարական կազմակերպությունները պատրաստ են սիրիացի տեղահանվածներին աջակցելու համար տրամադրել 142 մլն դոլար, ևս 80 մլն կտրամադրի ԱՄԷ-ում Կարմիր մահիկի մասնաճյուղը:
Մեկ տարի առաջ տուժածներին ու փախստականներին ինչպես Սիրիայում, այնպես էլ հարևան երկրներում օգնելու համար հաջողվել էր հավաքել 1.5 մլրդ դոլար, սակայն Պան Գի Մունի հայտարարությամբ՝ ոչ բոլոր միջոցներն են փոխանցվել ՄԱԿ: Ընդհանուր գումարից պակասել է մոտ 30 տոկոսը: «Ֆինանսավորման մեջ լուրջ ճեղք կա»,- ասել էր նա:
