Ամերիկացի լրագրող Դևիդ Սեթերին առանց պատճառների արգելել են մուտք գործել Ռուսաստան՝ հաղորդում է բրիտանական The Guardian պարբերականը:
The Financial Times-ի նախկին լրագրող և Ռուսաստանի, Խորհրդային Միության մասին մի քանի գրքերի հեղինակ Սեթերին Մոսկվայում հաստատվել էր 2013թ. սեպտեմբերին՝ որպես «Ազատություն» ռադիոկայանի աշխատակից: 2013թ. դեկտեմբերին Սեթերը մեկնել է Կիև և ցանկացել է երկարացնել իր այցագիրը, սակայն Ուկրաինայում Ռուսաստանի դեսպանատանը լրագրողին հայտարարել են. «Կոմպետենտ մարմինները որոշել են, որ ձեր հետագա ներկայությունը Ռուսաստանի տարածքում ցանկալի չէ»:
Հաղորդվում է, որ ՌԴ-ում ԱՄՆ դեսպան Մայքլ Մաքֆոլը քննարկել է Սեթերի շուրջ ստեղծված իրավիճակը ՌԴ փոխարտգործնախարարի հետ:
Բրիտանական պարբերականը նշում է, որ Սեթերի արտաքսումը դարձել է լրագրողի արտաքսման առաջին դեպքը սառը պատերազմի ժամանակներից ի վեր:
