ԱՄՆ նախագահ Դոնալդ Թրամփը Սպիտակ տան Իրավիճակային սենյակում կայացած խորհրդակցության ժամանակ քննարկել է Իրանի դեմ լայնածավալ ռազմական գործողության նախապատրաստումը, որն ըստ Axios-ի աղբյուրների, զգալիորեն գերազանցելու է ներկայիս հարվածների ծավալները:
Ըստ հաղորդվող տեղեկությունների՝ ԱՄՆ վարչակազմը պատրաստ է գնալ էսկալացիայի՝ Իրանին այնպիսի ծանր վնաս հասցնելու նպատակով, որը ստիպի երկրի ղեկավարությանը ապաշրջափակել Հորմուզի նեղուցը և ընդունել Վաշինգտոնի պահանջները միջուկային ծրագրի վերաբերյալ։
Փակ հանդիպմանը, բացի ԱՄՆ նախագահից, ներկա են գտնվել փոխնախագահ Ջեյ Դի Վենսը, պետքարտուղար Մարկո Ռուբիոն, պաշտպանության նախարար Փիթ Հեգսեթը, Զինված ուժերի շտաբների պետերի միացյալ կոմիտեի նախագահ գեներալ Դեն Քեյնը, ԿՀՎ տնօրեն Ջոն Ռեթքլիֆը և հատուկ ներկայացուցիչ Սթիվ Ուիթքոֆը։
Քննարկումների առանցքում եղել է Իրանի տարածքում գտնվող ռազմավարական նշանակության օբյեկտներին նոր և մասշտաբային հարվածներ հասցնելու հարցը, որոնք պետք է լրացնեն Հորմուզի նեղուցի հատվածում իրականացվող ընթացիկ գործողությունները։
