«Մեզ համար շատ ուրախալի է այդպիսի շռնդալից հաղթանակը»,- լրագրողների հետ զրույցում ասաց «Սասնա ծռեր» կուսակցության նախաձեռնող խմբի անդամ Ժիրայր Սեֆիլյանը՝ հավելելով, որ ժողովրդին կեղեքող ուժերը պետք է հասկանան՝ իրենք մեկընդմիշտ վերջացած են այլևս:
Նա նշեց, որ իրենց առաջնային պահանջներից է եղել այսօրվա խորհրդարան կոչվածը լուծարելը. «Համոզված ենք, որ այդ ամենը սարերի ետևում չի, և մենք ամեն ինչով օժանդակելու ենք, որ դա հնարավորինս արագանա»:
Հարցին՝ դուք ձեզ համարո՞ւմ եք քաղաքական սուբյեկտ, որը պատրաստ է գնալ վարչապետ Նիկոլ Փաշինյանի հետ բանակցություններին, Ժիրայր Սեֆիլյանը պատասխանեց. «Ոչ միայն մենք ենք մեզ համարում սուբյեկտ, այլև մեր ժողովրդի բավական զգալի մասը: Անշուշտ, պատրաստ ենք բանակցությունների և օժանդակելու գործող իշխանություններին»:
Գնահատելով իշխանությունների գործունեությունը՝ Սեֆիլյանն ասաց. «Իհարկե, անցումային փուլի այս մեթոդը չի համապատասխանում մեր պատկերացումներին: Այդ ամբողջը շատ ավելի վիրահատական տրամաբանություն պետք է ունենա, և լինի ավելի կոշտ կառավարում»:
Մանրամասները՝ տեսանյութում:
