Թայլանդի Սահմանադրական դատարանը չորեքշաբթի օրը ձայների մեծամասնությամբ որոշել է, որ երկրի հիմնական օրենքի հոդվածներից մեկում կատարված փոփոխությունները հակասում են 68 հոդվածին, որի համաձայն «սահմանադրական միապետության տապալմանն ուղղված» ցանկացած ուղղումներ անօրնական են: Այս մասին հաղորդում է РИА Новости-ն՝ հղում կատարելով տեղական ԶԼՄ-ներին:
Փաստացի դատարանը 386 նախկին պատգամավորների և սենատորների մեղադրում է պետական հեղաշրջման փորձի մեջ, հաղորդում է Ազգային երրորդ հեռուստաալիքը:
Սահմանադրական դատարանի նիստը, որտեղ պետք է քննարկվի քվեարկած պատգամավորների մեղավորության աստիճանը, նշանակված է հունվարի 15-ին, ասվում է հաղորդագրության մեջ:
Խորհրդարանական քվեարկության միջոցով հեղափոխության փորձի մեջ մեղավորությունը հաստատվելու դեպքում խորհրդարանի նախկին կազմի պատգամավորներին նվազագույնը հինգ տարով քաղաքական գործունեություն ծավալելու արգելք, իսկ առավելագույնը մահապատիժ կամ ցմահ բանտարկություն է սպառնում:
Նշենք, որ Սահմանադրության 190-րդ հոդվածը, որը ցանկանում էին փոփոխել իշխող կուսակցության անդամները, պարտավորեցնում էր խորհրդարանական քննարկումների դնել Թայլանդի բոլոր միջազգային պայմանագրերը:
