Երևանի քաղաքապետի տեղակալ Արամ Սուքիասյանը մասնակցել է «Էրեբունի» պատմահնագիտական արգելոց-թանգարանի հիմնադրման 45-ամյակին նվիրված միջոցառմանը։
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ Արամ Սուքիասյանը Երևանի քաղաքապետ Տարոն Մարգարյանի անունից շնորհավորել է թանգարանի աշխատակիցներին և, շնորհակալություն հայտնելով հայրենանվեր աշխատանքի համար, նրանց է հղել Երևանի քաղաքապետի՝ օրվա առթիվ ուղերձը։
«Մեր քաղաքի օրրանն է Էրեբունի քաղաքատեղին, որի անխաթար պահպանությունը Երևանի զարգացման դինամիկայում մեր կարևորագույն նշանառություններից է։ Հնագիտական այս շերտերի պահպանությունը պատասխանատվություն է թե՛ երևանցիների և թե՛ ողջ մշակութային հանրույթի առջև։ Շնորհավորում եմ «Էրեբունի» արգելոց-թանգարանի աշխատակիցներին թանգարանի ստեղծման 45-ամյակի առթիվ։ Շնորհակալ եմ ձեր համեստ և անբասիր աշխատանքի համար, որի շնորհիվ յուրաքանչյուր այցելուի ներկայացվում է Երևանի ծննդյան պատմությունը»,- նշված է քաղաքապետի ուղերձում։
Նշենք, որ «Էրեբունի-Երևան 2795» տոնակատարության օրը պատմահնագիտական արգելոց-թանգարանի հիմնադրման 45-ամյակի առթիվ «Էրեբունի» արգելոց-թանգարանի տնօրեն Գագիկ Գյուրջյանը Երևանի քաղաքապետի կողմից պարգևատրվել էր քաղաքապետի ոսկե մեդալով, իսկ թանգարանի մի շարք աշխատակիցներ՝ քաղաքապետի պատվոգրերով և շնորհակալագրերով։
