«Նախկին իշխանության քաղաքական թիմը խորհրդարանում այլևս մեծամասնություն չէ, հուսանք, որ այդ քայքայումը կշարունակվի… Այն ուժերը, որոնք բռնությամբ տիրել էին իշխանությանը, ֆիասկո ապրեցին,- այս մասին «Առաջին լրատվական»- ի հետ զրույցում ասաց «Հանուն Հայաստան պետության» ճակատի անդամ Կարապետ Ռուբինյանը՝ հավելելով, որ պետք է հրաժարականներ տան, և նոր մարդիկ պետք է ղեկավարեն ԱԺ-ն և հանձնաժողովները:
Նա նաև ընդգծեց, որ ՀՅԴ-ն, «Ելք»-ը և «Ծառուկյան» դաշինքը կարող են իրենց հայտարարել որպես կոալիցիոն մեծամասնություն և ԱԺ նախագահի միասնական թեկնածու ներկայացնել:
Անդրադառնալով հարցին՝ ՀՀԿ խմբակցության անդամների թվաքանակի իջեցումը արհեստակա՞ն պրոցես է, թի՞մն է որոշում՝ ինչպես վարվել իր կազմի հետ, Ռուբինյանն արձագանքեց. «Չեմ կարծում, թե այդպես է: Թիմն ինչպե՞ս էր ձևավորվել. կարիերիստներ, մարդիկ, որոնք պետք է ապահովագրեին իրենց բիզնեսը և մարդիկ, որոնք հույս ունեին բարձր պաշտոններ զբաղեցնել, հիմա այդ հույսերը չեն կարող արդարանալ, և նրանք որոշում են դուրս գալ»:
Անդրադառնալով դիտարկմանը, որ ՀՀԿ խմբակցությունից դուրս են գալիս հիմնականում գործարարները, Ռուբինյանը նշեց, որ իր կարծիքով նրանք ցուցումով չեն դուրս գալիս. «Կարծում եմ իրենք են որոշում, որովհետև վերացել է այն պատճառը, ինչի համար իրենք դարձել են այդ խմբակցության անդամ: Արդեն այդ կուսակցությունում լինելը ապահովագրություն չէ ո՛չ իրենց բիզնեսի, ո՛չ իրենց ինչ-ինչ ճանապարհով ձեռք բերած ունեցվածիք համար»
Ռուբինյանը նաև նկատեց. «Այս նոր կառավարությունը քայլեր է անում կոռուպցիայի դեմ պայքարի առումով, ինչը ողջունելի է»:
Մանրամասն՝ տեսանյութում:
