«Հայկական Սփյուռքը բավական բարդ երևույթ է՝ իր աշխարհագրությամբ, տարբեր քաղաքակրթություններով, ինչպես նաև սփյուռքի հայերն ապրում են տարբեր հասարակարգերում, կան լեզվական, մշակութային, ենթամշակութային տարբեր հարցեր և այդ իմաստով այս բոլոր շերտերը հասկանալու, տիրապետելու համար բավական երկար ժամանակ է հարկավոր․ այն բնագավառը, որտեղ հիմնականում պետք է աշխատել՝ դա դեռևս չկազմակերպված հայկական գաղութներն են և Սփյուռքի նոր նախարարը սրա վրա պետք է հատուկ ուշադրություն դարձնի, բայց մյուս կողմից էլ պետք է ասեմ, որ անշնորհակալ կլինի այդպիսի աշխատանքը, քանի որ դրա արդյունքը մի քանի տարի հետո է երևալու։
Մի ուշագրավ հանգամանք էլ կա՝ Սփյուռքի նախկին նախարարի մոտ ցուցադրական գործելակերպը տիրապետող էր, այսինքն՝ հանդիսավոր կերպով, ցուցադրական կերպով էր ներկայացվում նրա այս կամ այն արածը․ սա պետք է փոխվի և կարծում եմ, որ նոր նախարարն այդպես չպետք է վարվի և պետք է գործ կատարի, ընդ որում՝ գործ կատարի ոչ թե ինչ-որ մեծ հավաքներ կազմակերպելով, այլ թեկուզ նաև լոկալ բնույթի, տեղ առ տեղ աշխատանքներ տանելով, ինչը կարող է շատ արդյունավետ լինել հայկական տարբեր գաղթօջախների, տարբեր համայնքներում մեր հայրենակիցների հետ հարաբերություններ հաստատելու, եղած հարաբերություններն ավելի սերտացնելու առումով»,- «Առաջին լրատվական»-ի հետ զրույցում ընդգծեց Ռամկավար ազատական կուսակցության (ՌԱԿ) ատենապետ Հակոբ Ավետիքյանը՝ խոսելով Հայաստան-Սփյուռք կապի ամրապնդման և այս ուղղությամբ Սփյուռքի նախարարության առաջնահերթությունների մասին։
Անդրադառնալով նաև Սփյուռքի նորանշանակ նախարար Մխիթար Հայրապետյանի հասցեին հնչող քննադատություններին՝ Հակոբ Ավետիքյանը նշեց․ «Հայաստանում մարդիկ կան, ովքեր սիրում են հակադրվելու համար հակադրվել․ այդ մարդիկ օգտվում են թերևս այն բանից, որ նոր նախարարը շատ երիտասարդ է և դեռևս անփորձ, բայց շատերը մոռանում են, որ երիտասարդ նախարարի գլխավոր առավելությունը հենց երիտասարդ լինելն է, քանի որ դա այն մեծ կապիտալն է, որ նման պետական պաշտոնյաներն ունեն և մյուս կողմից էլ՝ նրանք պետք է անընդհատ նորը սովորեն, ուսումնասիրեն և փորձ կուտակեն։ Կարծում եմ, որ մեզ մոտ չափազանց շատ է մարդկանց փնովելու, հեղինակազրկելու այդ բացասական երևույթը և դա կարծես հայկական ներքին խասյաթի է վերածվել, այս տարիների ընթացքում մենք այդ բացասական պրակտիկան բազմիցս տեսել ենք և գտնում եմ, որ դրանից պետք է ձերբազատվել»։
Այս համատեքստում մեր զրուցակիցը հավելեց նաև, որ նման մոտեցումներն իր գնահատմամբ՝ բացարձակապես ընդունելի կամ ողջունելի չեն և նորանշանակ նախարարներին քննադատելու փոխարեն պետք է աջակցել՝ իրենց ղեկավարած ոլորտում առկա խնդիրներին արագ և արդյունավետ լուծումներ տալու հարցում։
Մանրամասները՝ տեսանյութում։
