«Եթե դիտարկենք, որ սա ժամանակավոր կառավարություն է, ապա ճիշտ կլինի խոսել կարճաժամկետ լուծումների մասին, բայց միևնույն ժամանակ մենք խնդիրներ ունենք, որոնք երկարաժամկետ ռազմավարության հետ են կապված», – «Առաջին լրատվական»-ի հետ զրույցում նշեց ՓՄՁ համագործակցության ասոցիացիա ղեկավար Հակոբ Ավագյանը` անդրադառնալով նոր կառավարության առաջնահերթություններին կապված մասնավորապես ՓՄՁ սեկտորի զարգացման հետ։
Մեր զրուցակիցը ուշադրություն հրավիրեց այն հանգամանքի վրա, որ այս տարի արդեն ավարտվում է ՓՄՁ զարգացման ռազմավարության 2016թ-ի ծրագրի ժամկետը և արդեն ժամանակն է մտածելու նոր ռազմավարություն մշակելու մասին։
Այս համատեքստում Հակոբ Ավագյանը հավելեց նաև.
«Մենք այլևս շարժման ղեկավար Նիկոլ Փաշինյանից պետք է անցում կատարենք վարչապետ Նիկոլ Փաշինյանի և ինստիտուցիոնալ ձևով նրան մոտենանք. ոլորտում ունենք ֆունդամենտալ խնդիրներ, որոնց լուծման համար հնարավորինս արագ օրենսդրական փոփոխությունների անհրաժեշտություն կա»։
Մեր զրուցակցի տեղեկացմամբ` իրենց ասոցիացիան վերջին մի քանի օրվա ընթացքում բավականին շատ նամակներ է ստացել Ռուսաստանի Դաշնությունում գործունեություն ծավալող իրենց գործընկերներից, ովքեր տեսնելով Հայաստանում տեղի ունեցած փոփոխությունները` ցանկություն են հայտնում Հայաստանում ներդրումներ անելու.
«Բացի այսպիսի փոփոխություններից` ցանկացած ներդրողի համար չափազանց կարևոր է նաև իր ներդրումների պաշտպանվածությունը և այստեղ արդեն անկախ դատական համակարգ ունենալու խնդիր ունենք, ինչին ևս նոր կառավարությունը պետք է ուշադրություն դարձնի։ Բացի դրանից մեզ պետք են նաև բիզնես շահերի պաշտպանության այլընտրանքային անկախ մոդելներ, որոնք իրենց հերթին ևս ապահովության երաշխիք կհանդիսանան ներդրողների համար», – ընդգծեց Հակոբ Ավագյանը։
Մանրամասները` տեսանյութում։
