«Առաջին լրատվական»-ի զրուցակիցն է Ռոբերտ Քոչարյանի խնամի, ԱԺ ՀՀԿ խմբակցության պատգամավոր Վոլոդյա Բադալյանը, ով «շատ նորմալ» է համարում ՌԴ նախագահ Վլադիմիր Պուտինին դրոշակներով ու մարդկանց փողոցներում կանգնեցնելով դիմավորելու նախաձեռնությունը:
– Պարոն Բադալյան, ինչպե՞ս կգնահատեք, որ երեկ ոստիկանությունը բավական մարդ է ձերբակալել՝ հակապուտինյան ակցիաներ անելու համար:
– Ես տեղյակ չեմ՝ երեկ ինչ է կատարվել, ես չեմ եղել փողոցում, որ տեղյակ լինեմ: Ես տեղյակ չեմ՝ ով է ձերբակալվել, ինչու է ձերբակալվել: …Ես հակապուտինյան ոչինչ չեմ արել: Ես եղել եմ ԱԺ նիստի, որից հետո գնացել եմ մեր տուն: Եւ պարտականություն չունեմ, որ գնամ փողոց, տեսնեմ՝ ով ում ա բռնել կամ ինչի ա բռնել:
– Բայց չէ որ Դուք պատգամավոր եք, հասարակական գործիչ, պիտի տեղյակ լինեիք, պիտի այդ մարդկանց կողքին լինեիք:
– Այդ մարդկանց կողքին ես չէի կարող լինել, բայց նրանք նոր Հայաստանի քաղաքացի են, որոնք ունեն իրենց պահանջները, ինչ են ասել, տեղյակ չեմ, որ մեկնաբանեմ: Ես շուրջ 15 տարի հայ-ռուսական հանձնաժողովի անդամ եմ, Ռիժկովի հետ եղել ենք համանախագահներ, ձեւավորել ենք հայ ռուսական հասարակական կառույց: Էնպես որ իմ կողմնորոշումը հստակ է:
– Պարոն Բադալյան, իսկ ինչպե՞ս կգնահատեք Պուտինի այցի հետ կապված ժողովրդին դրոշակներով դուրս հանելը, արդյոք նման ընդունելության հարկ կա՞ր:
– Եթե Դուք հարցնում եք իմ կարծիքը, դա շատ նորմալ ա: Ես կառավարել ու ղեկավարել եմ մի գործարան, որտեղ աշխատել ենք միշտ Ռուսաստանի հետ: Ունեցել ենք հարյուրավոր պարտնյորներ, որոնց հետ կարողացել ենք աշխատել: Եվ այսօր տնտեսական այն ոլորտը, որ կապված է հայ-ռուսական հարաբերությունների հետ, չունենք այլ երկրների հետ, իսկ այսօր երկրի համար աշխատանքն է կարևոր և սոցիալական հարցը լուծելը:
– Պարոն Բադալյան, Դուք աշխատել եք Խորհրդային Միության ժամանակ, իսկ հիմա մենք սուվերեն պետություն ենք: Չե՞ք կարծում, որ մի քիչ ստրկամտության հոտ է գալիս մարդկանց փողոցներ հանելով ու դրոշակներ բաժանելով՝ ընդունելու մի երկրի նախագահի, որը ստիպել է մեզ մտնել Մաքսային միություն:
– Դա Ձեր կարծիքն է, որ որևիցե մեկը ստիպել է, Հայաստանի Հանրապետության իշխանությանը որևիցե մեկը չի ստիպել որևիցե տեղ մտնելու: Դա էսօր մեր տնտեսական և քաղաքական շահերից ելնելով ժողովուրդն իր կամքն էր արտահայտում և դուրս էր եկել փողոց: Որևիցե մեկին իմ ընդհանուր ծանոթներից չէին ասել, ստիպել` դուրս եկեք, դրոշակներով դիմավորեք:
– Կարծում եք` Հայաստանի քաղաքացին ոչ մի հոգս չունի և Պուտինի այցով այնքան է ոգևորված, որ կարող էր դրոշակներով դուրս գալ փողո՞ց:
– Այո, այո:
– Իրո՞ք հավատում եք դրան:
– Շատ եմ հավատում, որովհետև Հայաստանի քաղաքացիների մեծ մասն այսօր աշխատում են հայ-ռուսական տնտեսական դաշտում և ողջունում են մեր միասնությունը Ռուսաստանի հետ, բայց պահպանելով մեր սուվերենությունը: Էսօր միլիոն ու կես և ավելի հայեր ապրում են Ռուսաստանի տարածքում:
– Հայերը Ռուսաստանում իրենց աշխատանքով են ապրում, պարոն Բադալյան, ձրի Ռուսաստանը ոչ մեկին չի կերակրում:
– Իսկ կարո՞ղ է պատահի ձրի որևիցե մեկը կերակրում է:
– Ուզում եմ ասել, մարդիկ այնտեղ իրենց մի կտոր հացն են վաստակում: Այնպես չի, որ իրենք արտոնյալ պայմաններում են ապրում Ռուսաստանում ու այստեղ էլ պիտի դրոշակներով դիմավորեն ՌԴ նախագահին, ինչը նրանց, թերևս, ավելի շատ հարկադրել են:
– Դուք մի մարդու հետ եք խոսում, որը մեծ ուրախությամբ ընդունում է մեր Հայաստան-Ռուսաստան միասնությունը: Տնտեսական դաշտը զարգացնել մենք կարող ենք Ռուսաստանի հետ: Մենք էսօր Եվրոպայում չունենք անելիք տնտեսական ոլորտում:
– Այսօր մեր տնտեսական թիվ մեկ գործընկերը Եվրոպան է և ոչ թե Ռուսաստանը:
– Ինչո՞ւ, հումք վաճառելո՞վ, էս ո՞ր թիվն է: Ես և տնտեսական, և ստրատեգիկ ոլորտի մասին եմ խոսում: Եվ էսօր, եթե կա ինչ-որ մի բան, որը պահպանում է Հայաստանի անվտանգությունը, ես ռուսների հետ միասին եմ դա տեսնում:
– Ասել է թե` մենք ի զորու չենք ոչ մեր տնտեսական հարցերը լուծել աշխարհի հետ, ոչ մեր անվտանգությո՞ւնն անգամ ապահովել:
– ԱՄՆ-ն այսօրվա իր կարգավիճակով և հզորությամբ բացարձակապես չի կարող պահպանել իր անվտանգությունը, ինչ մնաց Հայաստանը, որը շրջապատված է իր ոխերիմ թշնամիներով:
– Այ, Դուք ասում եք` մեզ որևէ մեկը չի պարտադրել մտնել Մաքսային միություն, սակայն Հայաստանի իշխանությունը չորս տարի բանակցում էր ԵՄ Ասոցացման պայմանագիրը ստորագրելու համար: Ձեր կարծիքով՝ այդ բանակցությունները ֆա՞րս էին:
– Ոչ, հիմա էլ է շարունակվում դա, և դա կունենա իր արդյունքները:
– Սակայն փաստ է, որ որևէ բան չստորագրվեց:
– Մասնակցել էր նաև Ուկրաինան, և որևիցե մեկը չստորագրեց, ինչու եք Դուք վերցնում մենակ Հայաստանը: Կան քաղաքական խնդիրներ, և կան տնտեսական խնդիրներ: Ես համարում եմ, որ Մաքսային միության մեջ է մեր երկրի տնտեսական զարգացումը:
