«Ժառանգություն» խմբակցության ղեկավար Զարուհի Փոստանջյանը ՌԴ նախագահ Վլադիմիր Պուտինի՝ Գյումրի կատարելիք այցի հետ կապված աժիոտաժին բացասաբար է վերաբերվում: Այսօր լրագրողների հետ ճեպազրույցում պատգամավորը դա համարեց գավառամտության դրսևորում:
«Սա գավառամտության դրսևորում է, և շատ ցավալի է, որ 22 տարիների ընթացքում՝ Խորհրդային Միության այդ քաղաքակրթության տապալումից հետո, մենք չկարողացանք նորից վերականգնել մեր քաղաքակրթությունը: Սա վկայում է դրա մասին, և այս 22 տարիները փաստորեն մենք փոշիացրինք: Սա ուղղակի մեր ինքնիշխանության ոչնչացում է, և նման ձևով վերաբերմունք արտահայտելը, նորից եմ ասում՝ ինչ-որ չափով նաև գավառամտության դրսևորում է, որը մենք դեռ մեր միջից չենք հանել, և սա է հենց մեր ձախողման պատճառը»,- ասաց նա:
Փոստանջյանի խոսքով՝ հատկապես ցավալի է, որ այդպիսի վերաբերմունք է ցուցաբերվում այն պետության ներկայացուցչի նկատմամբ, ով վերջերս զանգվածային ոչնչացման հսկայական ծավալի զինամթերք վաճառեց Ադրբեջանին:
Դիտարկմանը՝ փաստորեն Պուտինը գալիս է իր հետ տանելու Հայաստանի սուվերենությո՞ւնը, պատգամավորը դրական պատասխան տվեց: «Իհարկե, գալիս է դրա համար, բայց մյուս կողմից՝ ինքը դեռ խնդիր ունի իր մեջ»,- ասաց նա:
Հարցին՝ Պուտինի այցին նախապատրաստվող զանազան խմբերի նախաձեռնություններին արդյոք «Ժառանգությունը» մասնակցություն կունենա՞, Փոստանջյանը պատասխանեց, որ այժմ տեղի է ունենում գործընթաց՝ հասարակության մեջ բոլոր առողջ ուժերը, ովքեր հասկանում և գիտակցում են, թե ինչ է տեղի ունենում Հայաստանի Հանրապետության ինքնիշխանության հետ, նրանք բոլորն այսօր ակտիվ միջոցառումների իրականացման ջատագովներ են:
«Ժառանգության ներկայացուցիչները ևս, համագործակցելով բոլոր այդ միավորների հետ, մասնակից են լինելու բոլոր այն գործընթացներին, որոնք պետք է տեղի ունենան Հայաստանի Հանրապետությունում»,- ասաց նա:
