«Երևանյան հեռանկարներ» 14-րդ միջազգային երաժշտական փառատոնի շրջանակներում «Արամ Խաչատրյան» մեծ համերգասրահում երեկ տեղի ունեցավ աշխարհահռչակ ջութակահար Մաքսիմ Վենգերովի մենահամերգը: Համերգն անցավ ջերմ ու անկաշկանդ մթնոլորտում: Դահլիճում ազատ տեղեր չկային, շատերը նստել էին հավելյալ դրված աթոռներին:
Վենգերովը ժամանակ առ ժամանակ մոտենում էր բարձրախոսին և այս կամ այն ստեղծագործության հետ կապված որևէ պատմություն պատմում: Մեծանուն երաժշտին բեմում նվագակցում էր հայ ոչ պակաս հայտնի դաշնակահար Վահագն Պապյանը:
Մենահամերգի ծրագրում ներառված էին ստեղծագործություններ Յոհան Սեբաստիան Բախից, Նիկոլո Պագանինիից, Յոհաննես Բրամսից, Ֆրից Կրայսլերից, Էժեն Իզայիից, Հենրիկ Վենյավսկիից և Անտոնին Դվորժակից:
Միջոցառման ավարտին հանդիսատեսը բազմաթիվ «բրավո»-ներով ու «բիս»-երով ստիպեց երաժշտին երկու անգամ բեմ վերադառնալ:
Վենգերովը, դահլիճի բուռն ծափահարությունների ներքո, իր ելույթը եզրափակեց Կոմիտասի «Կռունկ»-ով:
