2017-ին աշխարհում մահապատիժների թիվը նվազել է։ Այս մասին ասվում է Amnesty International միջազգային իրավապաշտպան կազմակերպության հաշվետվությունում, փոխանցում է Deutsche Welle-ն։
Անցյալ տարի մահապատժի կիրառման 993 դեպք է գրանցվել, ինչը 4 տոկոսով պակաս է 2016-ի համեմատ։
Մահապատիժ հիմնականում կիրառվում է Իրանում, Սաուդյան Արաբիայում, Իրաքում և Պակիստանում։ Այս երկրներում է տեղի ունենում նման դեպքերի 87 տոկոսը։
2017-ին Իրանում 11 տոկոսով ավելի քիչ են եղել մահապատժի դեպքերը, Պակիստանում՝ 31 տոկոսով, Եգիպտոսում՝ 20։
Նշվում է, որ խոսքը միայն այն դեպքերի մասին է, երբ անկասկած մահապատիժ է կիրառվել։ Շատ երկրներում իրական վիճակագրությունը չի նշվում, իսկ Չինաստանը ոչ մի տվյալ չի հրապարակում և հայտնի չէ, թե ինչպիսին է այնտեղ դրությունը։
