ՌԴ նախագահ Վլադիմիր Պուտինի դեկտեմբերի 2-ին ՀՀ կատարելիք պաշտոնական այցը սկսվելու է Գյումրիում տեղակայված ռուսական 102-րդ ռազմաբազայից… Ըստ հայաստանյան լրատվամիջոցների՝ Պուտինի ինքնաթիռն իջնելու է Գյումրիի օդանավակայանում, իսկ Երևան նա գալու է Գյումրիից… Այս ամենին զուգահեռ՝ մեծ թափով ընդլայնվում է ՌԴ զինուժի 102-րդ ռազմաբազան, ինչին անմասն չէ նաև ՀՀ իշխանությունը:
Այն հարցերը, թե ինչու է ՌԴ նախագահի այցը նշանակված դեկտեմբերի 2-ին՝ անմիջապես Վիլնյուսում կայանալիք Արևելյան գործընկերության գագաթնաժողովից հետո, և ինչու է Պուտինի այցը սկսվելու Գյումրիի ռազմաբազայից, «Առաջին լրատվական»-ը քննարկեց ռուսաստանցի քաղաքական վերլուծաբան, քաղաքական սյունակագիր Սերգեյ Մարկեդոնովի հետ: Նա տեղեկացրեց, որ դեկտեմբերի 2-ը կարող է հատկանշական համարվել, բայց հնարավոր է նաև՝ ոչ, այդպես է հարմար եղել ՌԴ նախագահի աշխատակազմին: Բայց ամեն դեպքում ռուսաստանցի քաղաքագետը չի բացառում, որ այցը հատուկ է նշանակվել դեկտեմբերի 2-ից հետո, երբ ավարտված կլինի ԱլԳ գագաթնաժողովը:
Ինչ վերաբերում է այցը Գյումրիի ռազմաբազայից սկսելուն, ապա, ըստ մեր զրուցակցի, դա սիմվոլիկ նշանակություն ունի: «Այդ ռազմաբազան Հարավային Կովկասում ռուսական ներկայության քաղաքական խորհրդանիշն է և ազդանշան է այն մասին, որ ԼՂ հակամարտության խաղաղ կարգավորման ուղղությամբ ցանկացած մոտեցում ընդունելի է, բացի ուժայինից: Սիմվոլիզմի երրորդ մասը հետևյալն է, որ ՌԴ-ն հետխորհրդային տարածաշրջանում տարածքները դիտարկում է որպես հետաքրքրությունների էքսկլյուզիվ դաշտ, ուստի ՌԴ ներկայությունը տարածաշրջանում պետք է լինի շոշափելի: Իսկ նրանում, որ Պուտինն առաջինը լինելու է Գյումրիում, ոչ մի լուրջ պատճառ չպետք է փնտրել: Դա ցույց է տալիս այդ ռազմաբազայի խորհրդանշական լինելը»,- համոզված է Ս. Մարկեդոնովը:
Ռուսաստանցի փորձագետը համաձայն չէ շրջանառվող այն տեսակետների հետ, թե նման ռազմական էքսպանսիան կարող է լուրջ ռազմական մրցավազք առաջացնել տարածաշրջանում Արևմուտքի և ՌԴ-ի միջև: «Ի՞նչ ներկայություն ունի Արևմուտքը և ի՞նչ պետք է անի` դա կանխատեսելի չէ ընդհանրապես: Կովկասը Մերձավոր Արևելք չի դառնա, չի լինի «սառը պատերազմ», այդ էջը փակված է, իսկ Ուկրաինայի հարցն առաջին հերթին հետաքրքրությունների խնդիր է՝ սոցիալ-տնտեսական, քաղաքական և այլն: Ռազմական մրցավազք չի լինելու, դա այլևս արդիական թեմա չէ ներկայումս»,- նկատեց նա:
Անդրադառնալով ՀՀ-ի հետ Պուտինի նախաձեռնությամբ ձևավորվելիք ՀՕՊ միասնական համակարգին՝ Ս. Մարկեդոնովն ասաց, որ դա ևս սիմվոլիկ բնույթ է կրում: «Չեմ կարծում, որ այդ համակարգի առջև որևէ ռազմական խնդիր է դրվելու: Համակարգն արդեն Բելառուսի հետ գործում է, այստեղ առաջին պլանում պետք է տեսնել քաղաքական բաղադրիչ, այսինքն՝ ոչ այնքան ռազմական: Քիչ հավանական է նաև այն, որ ՌԴ-ն ՄՄ-ին զուգահեռ ռազմական բաղադրիչ է ավելացնում, քանի որ այն արդեն կա ի դեմս ՀԱՊԿ-ի, ոչ մի նոր բան չի ձևավորվում»,- պարզաբանեց Ս. Մարկեդոնովը:
