Հարյուրավոր հայ երիտասարդներ, ովքեր դժգոհ են պարտադիր կուտակային կենսաթոշակային համակարգից, այսօր Կառավարության առջև բողոքի ակցիա անցկացրին: Բողոքի ակցիան հսկում էին մեծ թվով ոստիկաններ, հավաքվել էին «Նիկոլ Աղբալյան» ուսանողական միության անդամները, ՏՏ ոլորտի ներկայացուցիչներ, պարզապես նոր համակարգից դժգոհ քաղաքացիներ, ովքեր նամակ փոխանցեցին կառավարությանը:
Ակցիայի մասնակիցները կառավարության ներկայացուցիչներից պահանջում էին իջնել և պատասխանել իրենց հարցերին, սակայն փոխարենը դուրս եկավ միայն Կառավարության դիմումների և նամակների վարչության պետ Ալեքսանդր Ղազարյանը, ով հրաժարվեց պատասխանել երիտասարդների հարցերին:
Փոխոստիկանապետ Վալերի Օսիպյանը հավաքվածների առանձին խմբերի հետ զրուցելով՝ նշեց, որ ներկա է միայն հասարակական կարգի պաշտպանության համար:
«Ես ուղղակի որպես հասարակական կարգն ապահովող պատասխանատու եմ այստեղ: Ձեր ակցիան, ճիշտ է, կրում է խաղաղ բնույթ, բայց ճիշտ կլիներ նախապես լիազոր մարմնից թույլտվություն ստանալ»,- ասաց նա:
Պնդմանը, թե սա շտապ հավաք է, Օսիպյանը պատասխանեց, որ այն շտապ հավաք չի կարող լինել, քանի որ կայքերում, սոցիալական ցանցերում նախապես արդեն տեղեկացրել են այդ մասին:
Ակցիայի մասնակիցները պահանջում էին, որպեսզի օրենքը գոնե մեկ տարով հետաձգվի՝ այն կետ առ կետ քննարկել կարողանալու և համաձայնության գալու համար: Երիտասարդների ձեռքերին փուչիկներ էին՝ որպես կենսաթոշակային նոր համակարգի խորհրդանիշ:
ՏՏ ոլորտի մասնագետները նշում են, որ այս օրենքից հատկապես տուժելու են իրենք: Նրանք նաև նշում են, որ օրենքի ընդունումը կարող է արտագաղթի նոր ալիքի պատճառ դառնալ:
Ակցիայի մասնակիցները որոշում կայացրին՝ նմանատիպ ակցիաները դարձնել ամենշաբաթյա և շարունակել այնքան ժամանակ, քանի դեռ իրենց պահանջները չեն բավարարվել:
