ՀՀ տրանսպորտի և կապի նախարության տրանսպորտային տեսչության կողմից այս տարվա առաջին հինգ ամիսների ընթացքում թեթև մարդատար տաքսի-ավտոմոբիլներով ուղևորափոխադրում իրականացնող իրավաբանական և ֆիզիկական անձանց նկատմամբ կազմվել է 2345 արձանագրություն, որից 1868-ը՝ սպիտակ հիմնագույնի հաշվառման համարանիշներով փոխադրումներ իրականացնելու համար: Այս մասին ասվում է ՀՀ տրանսպորտի և կապի նախարության տարածած հաղորդագրության մեջ։
Ընդ որում՝ 886 արձանագրություն կազմվել է կազմակերպությունների, իսկ 982-ը՝ անհատ վարորդների նկատմամբ: Ի դեպ, վերոնշյալ ժամակահատվածում ավելի շատ խախտումներ կատարել են հետևյալ լոգո տարբերանշաններով տաքսի ծառայություն մատուցող կազմակերպությունները.
«Ա.Գ.Ա.» ՍՊԸ՝ «Շիվի», «Ավաղ» ՍՊԸ՝ «Ավանգարդ», «Արթուր Գայամյան» ԱՁ՝ «Արինա», «Կոնցերտո» ՍՊԸ՝ «Կոնցերտո», «Հար-Գալ Մոնոլիտ» ՍՊԸ՝ «Հար-Գալ», «Մելիեր» ՍՊԸ՝ «Պինկ», «Մուրկա» ՍՊԸ՝ «Ուլտրա», «Ռուէդառ» ՍՊԸ՝ «Էրագոն», «Վոլֆ-Գազ» ՍՊԸ՝ «Վոլֆ», «Վանո Դավթյան» ԱՁ՝ «Նյու-Վան»:
Նշված ժամանակահատվածում կազմված արձանագրությունների հիման վրա կայացված որոշումներով նշանակված վարչական տույժի կանխատեսվող գումարը կազմում է 28 մլն 255 հազար դրամ, իսկ սահմանված ժամկետներում վճարումներ չկատարած 391 անձանց նկատմամբ արձանագրությունների վերաբերյալ նյութերն ուղարկվել են ՀՀ վարչական դատարաններ:
