Այս պահին ԱԺ դիմաց թեժ ակցիա է: Ինչպես տեղեկացրել էինք, ԱԺ ոչ կոալիցիոն խմբակցությունների նախաձեռնությամբ Կենսաթոշակային բարեփոխումների օրենքից Պարտադիր կուտակային բաղադրիչի գործադրումը 2014թ. հունվարի 1-ից 2015թ. հունվարի 1-ը տեղափոխելու հարցը քննարկելու համար հրավիրված արտահերթ նիստը մեկնարկեց և ավարտվեց միանգամից: Ինչպես նիստի մեկնարկին տեղեկացրեց ՀՀ ԱԺ նախագահ Հովիկ Աբրահամյանը, արտահերթ նիստը չի կայանում, քանի որ «Հանրապետական» և «Օրինաց երկիր» խմբակցությունները բոյկոտել են նիստը, և քվորում չի ապահովվել:
Հովիկ Աբրահամյանը արտահերթ նիստը անցկացնելու համար տվել է 3 ժամ ժամանակ քվորում ապահովելու համար: Այս պահին ակցիայի մասնակիցները երթով շարժվում են դեպի ՀՀԿ գրասենյակ և պահանջում են պարտադիր կուտակային կենսաթոշակի մասին ՀՀ օրենքի նախագծից հանել «պարտադիր» բառը, որը հակասահմանադրական է: Պարտադրության սկզբունքը խախտում է սահմանադրության 8-րդ հոդվածով ամրագրված՝ անձի սեփականության իրավունքը, 31-րդ հոդվածով ամրագրված՝ անձի ազատությունը, և 14-րդ հոդվածի առաջին մասով ամրագրված՝ խտրականության դեմ արգելքի մասին դրույթները:
Երթին մասնակցում են տարբեր մասնագիտության տեր անձինք, այդ թվում՝ պատգամավորներ «Ժառանգություն» խմբակցությունից, ՀԱԿ-ից, ՀՅԴ-ից ու ԲՀԿ-ից: Այստեղ են նաև «Նիկոլ Աղբալյան» ուսանողական միության անդամներ՝ STOP կարգախոսով պաստառներով:
