Մայր Աթոռում ընթանում է Գերագույն հոգևոր խորհրդի ժողովը, որը կավարտվի վաղը. խորհուրդը համապատասխան հայտարարությամբ հանդես կգա: Գլխավոր թեման Պոլսո հայոց պատրիարքի ընտրությունների շուրջ ստեղծված փակուղային վիճակն է:
Վիրահայոց թեմի առաջնորդ Վազգեն եպիսկոպոս Միրզախանյանը «Առաջին լրատվական»-ի հետ զրույցում նշեց, որ խնդրի հանգուցալուծումը պիտի տա Պոլսի հայությունը: «Մենք՝ որպես Գերագույն հոգևոր խորհուրդ, փորձելու ենք հորդորել, ուղղություն տալ, մնացածը պիտի տեղում լուծվի»,- ասաց նա:
Բացթողումներ, նրա խոսքով, եղել են, և սա ուղղակի պետք է ցույց տա, որ հետագա անելիքների համար պատրիարքարանի, պոլսահայության համար հարկավոր է ունենալ նոր կանոնադրություն՝ հաստատված պետության կողմից, որ այսուհետ խնդիրներն ավելի հեշտ լուծվեն:
«Պոլսահայությունն ինքն իր ձեռքը պետք է վերցնի իր հարցերը լուծելու պատրաստակամությունը»,-հավելեց Վազգեն եպիսկոպոս Միրզախանյանը:
Հարցին՝ հնարավո՞ր է Արամ Աթեշյանին կարգալույծ անեն, մեր զրուցակիցը նշեց՝ ոչ, կարգալուծությամբ, դատապարտումներով հարցին լուծում չի տրվի, շատ նուրբ խնդիրներ կան: «Նման մոտեցումները կարող են ավելի բարդացնել իրավիճակը»,- հավելեց նա:
Ամբողջությամբ՝ տեսանյութում:
