Նախօրեին Կարեն Կարապետյանն այցելել էր էներգետիկայի և բնական պաշարների կառավարման նախարարություն, լսել 2017-ի գործունեության հաշվետվությունը: Կարապետյանի այդ այցը մնաց «Կրեմլի ցուցակի» ստվերում, մինչդեռ անգամ այդ համատեքստում այստեղ կան ուշագրավ նրբերանգներ: Սակայն՝ ոչ միայն դրանում:
Մի քանի օր առաջ հայտարարվեց էներգետիկայի նախարարի հրաժարականի մասին: Դրանից հետո Սերժ Սարգսյանը մեկնեց Ֆրանսիա, իսկ Կարեն Կարապետյանը՝ Դավոս: Նրանց վերադարձից հետո պարզվեց, որ նախարարի հրաժարականը չեղարկվել է, և Աշոտ Մանուկյանը մնում է՝ «նախագահի և վարչապետի հետ զրույցից» հետո: Թե ինչ են զրուցել՝ ոչ ոք չգիտի, որևէ մեկը մանրամասն չի հայտնել, սակայն պաշտոնապես հրաժարական տված նախարարը հետ վերցրեց հրաժարականն ու շարունակում է պաշտոնավարել, կարծես ոչինչ չէր եղել: Բայց եթե բանը հասնում է նախարարի հրաժարականին, դրա մասին պաշտոնապես հայտարարելուն, ուրեմն ինչ-որ բան, այնուամենայնիվ, եղել է, որովհետև հրաժարականի պաշտոնական հայտարարությունը չէր կարող անակնկալ լինել Սերժ Սարգսյանի համար, նա չէր կարող թերթից իմանալ, որ նախարար է հրաժարական տվել: Ուրեմն Սերժ Սարգսյանն իր հավանությունը տվել է այդ հրաժարականին, ըստ այդմ՝ հետո ինչ-որ բան փոխվել է, եթե հրաժարականը չեղարկվել է:
Բազմաթիվ հարցեր են առաջացել ու առ այսօր մնացել անպատասխան, մինչդեռ խոսքը ռազմավարական նշանակության ոլորտում անցուդարձի մասին է, և օրինակ՝ երբ վարչապետը լսում է 2017-ի հաշվետվությունը, ապա միայն եղած ու չեղած հրաժարականի պատմությունն ինքնին անլրջացնում է որևէ գործունեություն՝ անկախ նրանից, թե հատկապես ով ում է ստիպել հրաժարվել նախարարի փոփոխության մտադրությունից՝ Կարեն Կարապետյա՞նը Սերժ Սարգսյանին, թե՞ Սարգսյանը Կարապետյանին:
Էներգետիկայի նախարարություն այցի մյուս ուշագրավ հանգամանքը այն է, որ նույն օրը հայտնի էր դարձել ԱՄՆ հրապարակած «Կրեմլի ցուցակը», որում ՌԴ տնտեսաքաղաքական լայն վերնախավն է, դրան առնչվող գործարարները, «Ֆորբսի» ցուցակում տեղ գտած ռուսաստանցի միլիարդատերեր: Այդ ցանկում է նաև Սամվել Կարապետյանը, որը ոչ միայն Կարեն Կարապետյանի ֆինանսաքաղաքական հենարանն է, այլ նաև հայկական էներգետիկ ոլորտի խոշոր և, ըստ էության, ավելի խոշորացող խաղացող, որը խոստացել է 1 միլիարդ դոլարի ներդրումներ անել ոլորտում այս տարիների ընթացքում:
Այդպիսով, «Կրեմլի ցուցակում» անկասկած շոշափվում են Հայաստանի էներգետիկ ոլորտի հեռանկարները՝ ուղղակի թե անուղղակի, և այդ իմաստով էլ ուշագրավ է դառնում, որ ցուցակի հայտնի դառնալուց և դրանում Սամվել Կարապետյանի անվան տեղ գտնելուց հետո վարչապետ Կարեն Կարապետյանն այցելում է էներգետիկայի նախարարություն:
