Այսօր տեղի ունեցավ ԵՄ աջակցությամբ Հայաստանում իրականացվող «Շուկայի վերահսկողության պետական տեսչության ներդաշնակեցում միջազգային/ԵՄ ստանդարտներին և ինստիտուցիոնալ կարողությունների զարգացում» թվինինգ ծրագրի փակումը: Ինչպես իր խոսքում նշեց ՀՀ էկոնոմիկայի փոխնախարար Գարեգին Մելքոնյանը՝ այս թվինինգ ծրագիրը ուներ 3 հիմնական բաղադրիչ:
Առաջինը օրենսդրական և ենթաօրենսդրական փոփոխությունների հարցում ԵՄ-ի կողմից Հայաստանի պաշտոնյաներին աջակցությունն էր, որպեսզի ուսումնասիրվեն ԵՄ օրենքներն, ու մեր օրենսդրությունը դրանց համապատասխանեցնելու հնարավորությունները: Երկրորդը ոլորտի մասնագետների շրջանում կարողությունների (ունակությունների) բարձրացումն էր, որի շրջանակում իրականացվել են բազմաթիվ դասընթացներ, միջոցառումներ, կազմակերպվել են այցեր Մեծ Բրիտանիա և Լիտվա: Այս բաղադրիչի շրջանակում Հայաստանն անդամակցել է մի կազմակերպության, որի շնորհիվ հնարավորություն է ստացել տեղեկատվություն ունենալ համաշխարհային շուկայում վտանգավոր ապրանքների վերաբերյալ: Երրորդ բաղադրիչի շրջանակում իրականացվել են միջոցառումներ և ընդհանուր բնույթի հանդիպումներ Երևանում, Գյումրիում, Վանաձորում և այլ քաղաքներում, որպեսզի մասնագետների տեղեկացվածության մակարդակը բարձրանա:
«Ասել, որ նմանատիպ մի ծրագրի իրականացմամբ մենք բոլոր հարցերը կկարողանանք լուծել, որ ամեն ինչ այսօր այս դաշտում արել ենք՝ սխալ կլինի: Ծրագրի իրականացման շնորհիվ բավականին առաջընթաց կա, և մտածում եմ, որ պետք է այս համագործակցությունը շարունակվի, որպեսզի հետագայում նույնպես հնարավոր լինի ապահովել առաջընթաց, և մեր ունեցած համակարգերը ներդաշնակեցվեն համաշխարհային ժամանակակից ընդհանուր ձևաչափերին և փորձին»,- ասաց Գ. Մելքոնյանը:
Նրա խոսքով՝ այլ ոլորտներում իրականացվող թվինինգ ծրագրերը դեռ շարունակվում են: «Այն ոլորտները և այն թեմաները, որոնք հատկապես առնչվում և բխում էին Խորը և համապարփակ ազատ առևտրի համաձայնագրից (DCFTA), միգուցե այդ մասերում որոշակի շեշտադրումների փոփոխություն լինի, բայց ընդհանուր առմամբ թվինինգ ծրագիրը Հայաստանում շարունակվելու է: Մենք ներկայումս ունենք ընթացքի մեջ գտնվող 7 ծրագիր, և ևս 7 ծրագիր նախապատրաստական տարբեր փուլերում են: Ամեն դեպքում մենք հակված ենք ամբողջությամբ շարունակել այս ծրագիրը»,- ասաց Գ. Մելքոնյանը:
Լուսանկարը՝ PanARMENIAN Photo-ի
