Իտալացի մի խումբ ծրագրավորողներ գործարկել են MafiaLeaks կայքը, որի օգնությամբ նրանք նախատեսում են տեղեկատվություն հավաքել կազմակերպված հանցավոր խմբավորումների գործունեության մասին՝ հաղորդում է Agence France-Presse-ը:
Կայքը տեղեկատվությամբ կհամալրեն ինչպես կազմակերպված հանցավորության զոհերը, այնպես էլ անօրինական խմբավորումների նախկին մասնակիցները: Նախնական ստուգումից հետո տվյալները կփոխանցվեն լրագրողներին և իրավապահ մարմիններին:
Բոլոր տվյալների փոխանցումը կիրագործվի Tor ցանցով, որն օգտատերերին երաշխավորում է գաղտնիություն: Գաղափարի հեղինակների խոսքերով՝ դա արվում է իրազեկիչներին պաշտպանելու նպատակով: Կայքի մշակողները ևս հրաժարվում են հայտարարել իրենց անունները: Հայտնի է, որ նրանց թիվը տասից քիչ է, իսկ կայքը ստեղծել են սեփական միջոցներով:
Իրավապահ մարմիններին հետաքրքրել է այս գաղափարը: Միևնույն ժամանակ ոստիկանության ներկայացուցիչը մտավախություն է հայտնել, որ առանձին իրազեկիչներ կարող են համակարգն օգտագործել անձնական հաշիվները մաքրելու համար՝ հրապարակելով զրպարտող տեղեկատվություն անմեղ մարդկանց մասին:
Նոր կայքի համար նախատիպ է հանդիսացել WikiLeaks-ը:
