Հայաստանի մամուլի ակումբների ակտուալ թեման շարունակում է մնալ ՀԱԿ-իշխանություն երկխոսությունը: Սակայն որքան էլ որ քննարկումները թեժ են ստացվում, այն շարունակում է «լինել թե չլինելու» նման անորոշ մնալ:
Ինչևէ, այս թեմայի շուրջ այսօր բանավիճելու էին հրավիրված «Նոր ժամանակներ» կուսակցության նախագահ Արամ Կարապետյանը և ՀՀԿ ԱԺ պատգամավոր Հովհաննես Սահակյանը: Վերջինիս խոսքերով՝ իրենք չեն ասել, որ պատրաստ չեն երկխոսելու, պարզապես ՀԱԿ-ի 5 հոգանոց ֆորմատը իրենց համար անընդունելի է: «Մենք ավելի լայն և հեռանկարային խնդիր ենք դրել՝ ասելով, որ պատրաստ ենք բոլորի հետ նստել երկխոսելու, բայց ո՛չ այդ ֆորմատով»,- ևս մեկ անգամ վերահաստատեց Հովհաննես Սահակյանը:
Լրագրողների հարցին, թե այդ առումով նախագահի աշխատակազմի ղեկավար Կարեն Կարապետյանի տեսակետը կարելի՞ է պաշտոնական համարել, թե՞ Սերժ Սարգսյանն էլ իր հերթին կխոսի:
Հովհաննես Սահակյանը արձագանքեց՝ ասելով, որ եթե Լևոն Տեր-Պետրոսյանը հարց ուղղի՝ գուցե խոսի:
«Թե՛ ԿարենԿարապետյանի, թե՛ Ռազմիկ Զոհրաբյանի և թե՛ Գալուստ Սահակյանի տեսակետները, իհարկե, պաշտոնական են»,- ավելացրեց ԱԺ Հանրապետական պատգամավորը:
Արձագանքելով այս թեմային՝ Արամ Կարապետյանը նշեց, որ այս աժիոտաժի պատճառը ոչ հստակ ձևակերպումներն են: ՀԱԿ-ը երկխոսել ասելով՝ իշխանությանը առաջարկում է իշխանությունը հանձնել արտահերթ ընտրությունների միջոցով:
Լրագրողների հարցին՝ որքանո՞վ է ձեռնտու այս իրավիճակը, Արամ Կարպետյանը պատասխանեց, թե իրեն դրանից ոչ տաք է, ոչ էլ սառը: «Եթե դրանից կոռուպցիան նվազեր, ԼՂ հիմնախնդիրը լուծվեր, իշխանության օղակում փոփոխություններ տեղի ունենային, ժողովրդի սոցիալական վիճակը բարելավվեր, արտագաղթը նվազեր՝ թե՛ իրենք, թե՛ բոլորը կշահեին, բայց ներկա իրավիճակի դրական կողմը միայն այն է, որ քաղբանտարկյալներն են ազատ արձակվել, և երկրի ներսում լարվածությունն է թուլացել»,- ավելացրեց Արամ Կարապետյանը:
Բանավեճի ընթացքում հակադարձելով Արամ Կարպետյանին՝ Հովհաննես Սահակյանը հետաքրքրվեց, թե ով է իրենց ձեռքը բռնել իշխանափոխության համար, Արամ Կարապետյանը ստիպված եղավ պատասխանել, որ հենց բռնել են Մարտի 1-ով, բանտերը լցնելով, շինծու գործերով և այլն:
Իսկ հարցին, թե առաջիկայում Լևոն Տեր-Պետրոսյանն ու Սերժ Սարգսյանը կհանդիպե՞ն, Հովհաննես Սահակյանը արձագանքեց, որ քաղաքականության մեջ ոչինչ չի բացառվում:
Արամ Կարապետյանն իր հերթին անդրադառնալով այս հարցին՝ հիշեցրեց, որ Լևոն Տեր-Պետրոսյանն է Սերժ Սարգսյանին կարևորագույն օղակներում պաշտոնների տեղավորել, ինչը նշանակում է, որ նրանց միջև քաղաքական կուրսի նույնություն կա: Հետևաբար չի բացառվում, որ այդ կուրսի նույնությունը կարող է բերել միասնության:
