«Եթե չկա ոչ մի հետազոտություն, ապա դա արդեն չի կարող լինել պատճառ կամ հիմնավորում, թե ինչու պիտի արգելվի աջ ղեկով մեքենաների ներմուծումը Հայաստան։ Մեր պահանջը կառավարությունից հենց դա է, որ առանց հիմնավորման, առանց հստակ վիճակագրության պետք չէ վերցնել ու ուղղակի ասել կամ որպես որոշման հիմք ներկայացնել նման ինֆորմացիա, թե աջ ղեկանիվով մեքենաները վտանգավոր են երթևեկության համար, կամ դրանք ՃՏՊ-ների պատճառ են դառնում»,- «Առաջին լրատվական»-ի հետ զրույցում նշեց «Աջ ղեկ» նախաձեռնության համակարգող խմբի անդամ Արթուր Խաչատուրյանը։
Նրա խոսքով՝ հիմնական դրույթը, որը հարուցել է վարորդների զայրույթը, վերահաշվառման վերաբերյալ սահմանափակում մտցնելն է, ինչը ըստ Արթուր Խաչատուրյանի՝ սահմանադրական իրավունքի կոպիտ ոտնահարում է։
«Մեքենան տվյալ մարդու մասնավոր սեփականությունն է, որն այդ մարդն իրավունք ունի ցանկացած պահի վերահաշվառելու և օտարելու: Նախարարի հետ դեկտեմբերի 22-ին կայացած մեր հանդիպում-քննարկման ժամանակ այս հարցով ընդհանուր եզրակացության չեկանք. այն կետը, որը սահմանափակում է մեր սահմանադրական իրավունքը, մինչև այդ կետը նախագծից դուրս չգա, մենք ոչ մեկի հետ բանակցություններ չենք վարի: Ի՞նչ է նշանակում հակասահմանադրական դրույթի վերաբերյալ բանակցություն, չկա նման բան»,- շեշտեց նախաձեռնության անդամը։
Հարցին՝ ակնկալո՞ւմ եք, որ կառավարությունը կգնա փոխզիջումների և կբավարարի այդ պահանջը, Արթուր Խաչատուրյանը պատասխանեց. «Կարծում եմ՝ այո. կառավարությունում կլինեն այդքան իմաստուն, որպեսզի ոչ թե փոխզիջումների գնան, այլ ընդունեն մեր կողմից արդարացիորեն բերված հիմնավորումը, որ այդ դրույթը հակասահմանադրական է, իսկ եթե թույլ են տվել, որ հակասահմանադրական դրույթը տեղ գտնի նախագծում, և դրա համար ոչ մեկը չի պատժվել, ապա գոնե պետք է բարի լինեն և շատ արագ դա հանեն նախագծից»։
Հիշեցնենք, որ 2018-ի ապրիլի 1-ից կառավարությունը մտադիր է արգելել աջ ղեկով ավտոմեքենաների ներմուծումը. edraft.am կայքում արդեն մի քանի օր է՝ քննարկման է դրվել «Աջակողմյան ղեկային տեղաբաշխմամբ տրանսպորտային միջոցների ներմուծման ժամանակավոր արգելքի մասին» օրենքի նախագիծը, որտեղ նշվում է, որ Հայաստանում աջակողմյան ղեկով տրանսպորտային միջոցների շահագործումը վտանգավոր է: Օրենքի նախագծով առաջարկվում է նաև թույլատրել մինչև 2018թ.-ի ապրիլի 1-ը ներկրված տրանսպորտային միջոցների շահագործումը, սակայն սահմանափակել տրանսպորտային միջոցների վերահաշվառումը:
Մանրամասները՝ տեսանյութում։
