Կառավարության այսօրվա նիստում հաստատվել է «Հայաստանի և Ճապոնիայի կառավարությունների միջև «Պատմամշակութային ժառանգության գիտահետազոտական կենտրոնի՝ հնագիտական գտածոների վերականգնման եւ պահպանման համար սարքավորումների բարելավման ծրագիր» հայտագրերի փոխանակման ձևով կնքվող դրամաշնորհի ծրագիրը։
Նախագիծը ներկայացնող ՀՀ մշակույթի նախարար Արմեն Ամիրյանն իր խոսքում նշել է. «Գիտահետազոտական կենտրոնի կարևոր գործառույթներից է՝ վտանգված և վերականգնվող հուշարձանների պեղումները, որոնց արդյունքում հայտնաբերվել են հրատապ վերականգնման կարիք ունեցող հարյուր հազարավոր հնագիտական արժեքներ»:
Վարչապետ Կարեն Կարապետյանը հանձնարարեց հետագայում ներկայացնել կատարված աշխատանքները և հայտնաբերված հնագիտական արժեքները. «Որ տեսնենք՝ ինչքանով ենք կարողանում մեր քաղաքացուն, զբոսաշրջիկին ծանոթացնել, թե չէ մեկ-մեկ ինձ մոտ տպավորություն է, որ ինքնանպատակ է», – ասաց Կարեն Կարապետյանը։
