Մենք «Ավրորա» ծրագրի միջոցով փորձում ենք Հայաստանը դարձնել մարդասիրական կենտրոն. արդեն երկու տարի է, որ հավաքույթներ, կոնֆերանսներ ենք կազմակերպել, մրցանակի միջոցով աշխարհի տարբեր վայրերից բազմաթիվ մասնագետներ մեզ հետ մասնակցել են մարդասիրական ձեռնարկների, ու հիմա նմանապես հույս ունեմ, որ գիտության և տեխնոլոգիաների ոլորտում կարող ենք մշակել ծրագրեր, որոնցով Հայաստանը կկարողանանք ինչ-որ ձևով դարձնել հետաքրքիր վայր։ Այդ մասին «Առաջին լրատվական»-ի հետ զրույցում նշեց ամերիկահայ գիտնական, բարերար Նուբար Աֆեյանը։
Նրա խոսքերով, իհարկե, դժվարություններից մեկն այն է, որ Հայաստանը փոքր երկիր է, քիչ ռեսուրսներ ունի, բայց հայ ժողովուրդը սփռված է ամբողջ աշխարհում, կապեր ունի, և դրսում ապրող հայերը փափագում են, որ Հայաստանը վերադառնա իր նախկին համաշխարհային կարևորության աստիճանին։
«Գիտության մեջ այդ հնարավորությունը կա։ Ընդհանրապես, գիտությունը կախված է աշխարհում այդ ոլորտում քո ունեցած կապերից։ Այսինքն՝ ոչ ոք առանձին չի զբաղվում քիմիայով ու կենսաբանությամբ։ Մարդիկ գիտության մեջ իրենց ունեցած արդյունքները ներկայացնելով, աշխարհում ներկայացնում են մի ամբողջ համաշխարհային ցանց։ Այդ առումով շատ կարևոր հայեր կան, որոնք կարող են ավելի սերտ կապեր ստեղծել Հայաստանի հետ։ Պետք է այդ գործընթացն արագացնել»,- ասաց նա։
Հարցին, թե դրա արդյունքները ե՞րբ կարելի կլինի տեսնել, Աֆեյանը պատասխանեց. «Առաջին քայլերն արվում են։ Հիմա կանենք մի քանի հայտարարություններ, որոնք ցույց կտան, որ որոշ դրական արդյունքներ կան»։
Հարցազրույցն ամբողջությամբ՝ տեսանյութում: