Երևանի մամուլի ակումբի նախագահ, Արևելյան գործընկերության Հայաստանի ազգային պլատֆորմի համակարգող Բորիս Նավասարդյանն այսօր լրագրողների հետ հանդիպմանը անդրադարձավ Արևելյան գործընկերության Հայաստանի ազգային պլատֆորմի առաջիկա աշխատանքներին: Նա նշեց, որ պլատֆորմը վաղը քննարկում է կազմակերպել, որին հրավիրել են նաև կառավարության ներկայացուցիչներին, ներկա է լինելու նաև Եվրամիության պատվիրակության ղեկավարը: Նպատակն է քննարկել խնդիրը և մինչև նոյեմբերի կեսը ձևակերպել ակնկալիքները, քանի որ Հայաստանը յուրահատուկ իրավիճակում է հայտնվել:
Նա նշեց, որ Եվրամիության վրա գցել ամբողջ պատասխանատվությունը՝ միամտություն է և անկեղծ չէ: Մեր կառավարությունը գիտի՝ ինչպես են կայացվում Եվրամիությունում որոշումներ, և պետք չէ սպասել, որ այս ժամանակաշրջանում մեզ որևէ բան կառաջարկվի: Ոչինչ չի առաջարկելու Եվրամիությունը, նախաձեռնությունը պետք է գա Հայաստանից, Հայաստանը պետք է առաջարկի և սպասի, թե ինչ պատասխան արձագանք կլինի:
Բորիս Նավասարդյանի դիտակմամբ, սակայն, պաշտոնական մակարդակով շատ չեն քննարկումները, և կա համեստ մի նպատակ, որ ընդունվի հայտարարության նման մի բան, որը կճանաչի Հայաստանի նվաճումները այս ընթացքում, որ չստացվի՝ այս երեք-չորս տարվա աշխատանքն անիմաստ էր: Սա, ըստ նրա, դրական նշանակություն ունի և՛ մեր իշխանությունների համար, և՛ եվրահանձնաժողովի չինովնիկների համար:
Լուսանկարը՝ PanARMENIAN Photo-ի
