Վերաքննիչ քրեական դատարանում ավարտվել է Սյուզան Ջաղինյանի գործով բերված վերաքննիչ բողոքի քննությունը:
Կոտայքի մարզի ընդհանուր իրավասության դատարանը Մեսրոպ Մակյանի նախագահությամբ Սյուզան Ջաղինյանին մեղավոր էր ճանաչել հետևյալ արարքի համար:
46-ամյա Սյուզան Ջաղինյանը 2012 թվականի սեպտեմբերի 22-ին, ժամը 19-ն անց 7 րոպեին Հրազդան քաղաքի իր բնակարանից, իր օգտագործած բջջային հեռախոսից հաղորդագրություն է ուղարկել «Ա-Թի-Վի» հեռուստաընկերության «Կիսաբաց լուսամուտներ» հեռուստածրագրի կոնտակտային հեռախոսահամարին՝ տալով նախապատրաստվող ահաբեկչության մասին սուտ հաղորդագրություն:
Ջաղինյանն իր ուղարկած հաղորդագրությամբ նախազգուշացրել է. «Պատրաստվում եմ հենց վաղը պայթեցնել 14 հարկանի բնակելի շենք Հրազդան քաղաքում, մանրամասների համար հրավիրում եմ ձեզ ներկա գտնվել, ու ես կհանձնվեմ ձեր հեռուստաընկերությանը»:
Հաջորդ օրը՝ սեպտեմբերի 23-ին, ոստիկանության հատուկ մասնագիտացված պահպանության վարչության աշխատակիցները ծառայողական հետախույզ շների մասնակցությամբ նշված շենքում զննություն են կատարել՝ զենք-զինամթերք ու պայթուցիկ նյութեր հայտնաբերելու նպատակով, սակայն նման իրեր չեն հայտնաբերել:
Դրա փոխարեն հայտնաբերվել է նախապատրաստվող ահաբեկչության մասին սուտ հաղորդում տված քաղաքացուհին՝ Սյուզան Ջաղինյանը, ում մեղադրանք է առաջադրվել ՀՀ քրեական օրենսգրքի 259 հոդվածով:
Ընդհանուր իրավասության դատարանում Սյուզանն իրեն մեղավոր չի ճանաչել ու հրաժարվել է ցուցմունքներ տալուց: Դատարանը հիմք է ընդունել նրա նախաքննական ցուցմունքները:
Սյուզան Ջաղինյանն ավարտել է մանկավարժական համալսարանը, 1990 թվականին գործուղվել է Հրազդան, աշխատել թիվ 13 դպրոցում: Նա բնակվել է բարձրահարկ շենքի հանրակացարանային տիպի բնակարանում: Ցանկացել է սեփականաշնորհել այդ բնակարանը, նրան մերժել են:
Սյուզանը կենցաղային այլ խնդիրներ Էլ է ունեցել, նրա բնակարանում վերջին շրջանում անջատված է եղել ջրի ու էլեկտրաէներգիայի մատակարարումը:
Նախաքննական ցուցմունքում Սյուզան Ջաղինյանն ասել է, թե որևէ շենք պայթեցնելու մտադրություն չի ունեցել, երբևէ զենք կամ պայթուցիկ նյութ չի ունեցել:
Հուսահատ քաղաքացին «պայթյունի» օրն ընտրել է ոչ պատահականորեն. 2012 թվականի սեպտեմբերի 23-ին Հրազդանում տեղական ինքնակառավարման մարմինների ընտրության օր է եղել, քաղաքը եղել է լրատվամիջոցների ուշադրության կենտրոնում…
Ընդհանուր իրավասության դատարանը մեղավոր է ճանաչել Սյուզան Ջաղինյանին ու դատապարտել 40 օր կալանքի, ապա կիրառել է պայմանական դատապարտություն և սահմանել 1 տարի փորձաշրջան:
Դատավճիռը բողոքարկել էր ամբաստանյալ Ջաղինյանը: Նրա կարծիքով՝ իր նկատմամբ մեղադրական դատավճիռ չպետք է կայացվեր: Ջաղինյանը խնդրել էր բեկանել դատավճիռը, գործն ուղարկել նոր քննության:
Վերաքննիչ քրեական դատարանը այսօր մերժեց Սյուզան Ջաղինյանի բողոքը՝ անփոփոխ թողնելով ընդհանուր իրավասության դատարանի դատավճիռը:
«Բոլորդ էլ կոռումպացված եք»,- դատարանում հայտարարեց Սյուզան Ջաղինյանը՝ դժգոհ մնալով կայացված որոշումից:
