Լիտվայի արտգործնախարար Լինաս Լինկյավիչյուսը երեկ, ըստ էության, աննախադեպ հայտարարություն է արել` կապված այն բանի հետ, որ եթե Ռուսաստանը շարունակի ճնշումը իր հարևանների վրա, որոնք փորձում են սերտ հարաբերություններ կառուցել Եվրոպայի հետ, ապա Լիտվան էլ կարող է արգելափակել ցամաքային կապը Ռուսաստանի և նրա էքսկլավ-մարզ Կալինինգրադի հետ:
Սա, ըստ էության, սենսացիոն հայտարարություն է, և չնայած Լինկյավիչյուսը խոսում է ընդամենը նման գործողությունների տեսական տարբերակի մասին, այնուամենայնիվ հայտարարությունն ինքնին աննախադեպ է եվրոպական քաղաքականության համար: Ըստ էության, Լիտվայի շուրթերով եվրոպացիները Ռուսաստանին ակնարկում են, որ ուժային քաղաքականության դեպքում կստանան համարժեք պատասխան:
Հիշեցնենք, որ մի քանի շաբաթ առաջ Հարևանության և ընդլայնման հարցերով եվրահանձնակատար Շտեֆան Ֆյուլեն հայտարարել էր ուկրաինական մամուլին տված հարցազրույցում, որ Բրյուսելը պետք է պաշտպանի և փոխհատուցի Եվրամիության հետ ինտեգրացիայի պատճառով Ռուսաստանի ճնշման տակ հայտնված հետխորհրդային երկրներին: Եվ ահա, ըստ էության հնչում է բավական կոշտ հայտարարություն, որով Բրյուսելը Մոսկվային ասում է ոչ այլ ինչ, քան «ակն ընդ ական և ատամն ընդ ատաման»:
Կասկած չկա, որ այս ամենն, իհարկե, առաջին հերթին կապված է Ուկրաինայի խնդրի հետ, քանի որ նոյեմբերի 29-ը մոտենում է, իսկ Ռուսաստանի ճնշումներն էլ ուկրաինական կողմի վրա ավելի են մեծանում: Եվ Բրյուսելը բնականաբար պետք է Կիևին սովորականից ավելի առարկայական աջակցություն կամ օժանդակություն հայտնի, ինչն էլ հավանաբար փորձ է արվում դրսևորել Լիտվայի արտգործնախարարի տեսական սպառնալիքի միջոցով: Թե ինչքանով այդ ամենը գործնական երանգ կստանա, անկասկած կախված կլինի Ռուսաստանի քաղաքականությունից, Ռուսաստանի գործողություններից:
Չի բացառվում իհարկե, որ Եվրոպան անմիջապես չանցնի գործի, այլ ևս մեկ «նախազգուշական» կրակոց արձակի օդ՝ մինչև նոյեմբերի 29ը: Սակայն արդեն իսկ նշմարվում է, որ Կիևի հարցում Բրյուսելի տրամադրվածությունն առավել քան վճռական է, այլապես հազիվ թե սովորաբար քաղաքականապես առավել զուսպ Եվրոպան դիմեր նման բացահայտ սպառնալիքների:
Սակայն չի բացառվում նաև, որ Բրյուսելում նաև չափում են Ռուսաստանի արձագանքը, և փորձում են հասկանալ, թե մինչև նոյեմբերի 29-ը ինչքան հեռու կարող է գնալ Ռուսաստանը Կիևին Ասոցացման համաձայնագրի ստորագրումից հետ պահելու հարցում:
