Բարսելոնայի Mutt պատկերասրահում բացվել է նկարների ցուցահանդես, որտեղ ներկայացված աշխատանքները քառամյա Նապոլեոն անունով հովատակի «ձեռքի գործերն են»: Այս մասին գրում է The Daily Telegraph-ը: Ցուցահանդեսին ներկայացված է 9 աշխատանք՝ «Աբստրակցիաներն ախոռում» խորագրի տակ:
Նապոլեոնը սկսել է զբաղվել գեղանկարչությամբ այն բանից հետո, երբ նրա տերը պայմանավորվել է դրա մասին իր ընկերոջ՝ նկարիչ Սերխիո Կաբալիերոյի հետ: Գեղանկարիչը ձիու համար պատրաստել է ներկեր և կտավ, այնուհետև դրանք տեղափոխել է ախոռ, որտեղ և սկսվել է մարդու և կենդանու համագործակցությունը:
Նապոլեոնի նկարների ստեղծման պրոցեսը հետևյալն է. նա վերցնում է վրձինը ատամների մեջ, ապա՝ շարժելով գլուխը, ներկերը քսում է կտավին: Երբ Կաբալիերոն տեսնում է, որ այս կամ այն գույնը նկարի վրա արդեն շատ է, նա փոխում է այն և տալիս այլ գույնով վրձին:
«Ես կտավի վրա տպում եմ տարբեր պատկերներ, ապա Նապոլեոնին տալիս եմ, որպեսզի ներկի այն: Ես որոշում եմ նկարի չափերն ու գույները, ինչպես նաև օգնում եմ Նապոլեոնին, որպեսզի ինքը ճիշտ տեղում նկարի»,- պատմում է Կաբալիերոն: Նապոլեոնը սիրում է նկարել աբստրակտ էքսպրեսիոնիստական ոճի մեջ, և ձիու աշխատանքները նման են հոլանդացի գեղանկարիչ Վիլհելմ դե Կունինգի աշխատանքներին:
Նապոլեոնին կարելի է անվանել հաջողակ նկարիչ: Նրա աշխատանքներից արդեն գնել են Եվրոպայի կոլեկցիոներներից մի քանիսը: Նրա աշխատանքները գնահատվում են 3300-6000 եվրոյի սահմաններում:
