Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հանդիպումը կկայանա հուլիսի 11-ին՝ ավստրիական Մաուերբախ քաղաքում: Երկրների արտգործնախարարներին առաջարկվել է հանդիպել ԵԱՀԿ երկրների արտգործնախարարների ոչ պաշտոնական հանդիպման շրջանակում, որը տեղի է ունենալու հուլիսի 11-ին՝ ավստրիական Մաուերբախում: Սպասվում է, որ Լեռնային Ղարաբաղի հակամարտության հարցով միջնորդները նույնպես կմասնակցեն հանդիպմանը:
Երևանում և Բաքվում արդեն, ըստ էության, հաստատել են հանդիպման փաստը: Անշուշտ, բանակցությունները` թեկուզ կանխատեսելի ոչ դրական ելքով, գերադասելի են ռազմական գործողություններից, մանավանդ, երբ անցկացվում են ոչ թե միջնորդներից մեկի, օրինակ, Ռուսաստանի սեպարատ նախաձեռնությամբ, այլ ԵԱՀԿ հովանու ներքո:
Մյուս կողմից` պետք չէ ակնկալել, որ Նալբանդյան-Մամեդյարով հանդիպումը բեկում է մտցնելու կարգավորման գործընթացում կամ խաղաղություն է բերելու տարածաշրջանին: Խոսքը, եթե ավելի ճշգրիտ ձևակերպենք, նույնիսկ ոչ թե բանակցությունների, այլ ընդամենը մեկ հանդիպման մասին է, որն, ըստ ամենայնի, չի դնելու ինչ-որ գործընթացի մեկնարկ: Երևանում շարունակում են պնդել, որ հրաժարվում են կարգավորման բովանդակային քննարկումներից, քանի Ադրբեջանը չի կատարել հրադադարի պահպանման մեխանիզմների ներդրմանը վերաբերող Վիեննայի պայմանավորվածությունները, Բաքվում` հակառակը, շեշտը դնում են ստատուս-քվոն փոխելու անհրաժեշտության վրա: Ադրբեջանի ԱԳՆ-ի պաշտոնական ներկայացուցիչ Հիքմեթ Հաջիևն այսօր հայտարարել է, որ Ադրբեջանը պատրաստ է Լեռնային Ղարաբաղի հակամարտության շուտափույթ կարգավորման շուրջ առարկայական բանակցությունների:
Նման տարբեր օրակարգերը հիմք են տալիս ենթադրելու, որ Նալբանդյան-Մամեդյարով հանդիպումն ավելի շատ արարողակարգային է լինելու, և երկու արտգործնախարարները չեն կարողանալու պայմանավորվել անգամ Սարգսյան-Ալիև հանդիպման կազմակերպման հարցում:
Իհարկե, երկխոսությունը պատերազմից լավ է, սակայն չպետք է մոռանալ, որ յուրաքանչյուր հանդիպման ձախողում ավելի է մեծացնում պատերազմի վտանգը, մանավանդ, որ Բաքուն սովորություն ունի նման հանդիպումները նախորդել և հաջորդել սահմանային սադրանքներով: Այս պարագայում` հատկապես առաջնային է դառնում հայկական զինուժի զգոնությունը:
