Մաքսային միությանը Հայաստանի անդամակցության որոշումը լեգիտիմ չէ, այն կարելի է լեգիտիմացնել միայն հանրաքվեի միջոցով:
Սեպտեմբերի 18-ին լրագրողների հետ հանդիպմանը ԱԺ ՀԱԿ խմբակցության պատգամավոր Հրանտ Բագրատյանը նշեց, որ դեռ նախագահական ընտրություններին հանդես է եկել երեք ծրագրով՝ տնտեսական, արտաքին և ներքին քաղաքականության վերաբերյալ, եղել է միակ թեկնածուն, ով, իբրև արտաքին քաղաքականության մեջ որոշումների կայացման միջոց, նշել է հանրաքվեն:
«Ես զարմացած էի՝ ինչպես կարելի է մեր անվտանգությունը թողնելով Ռուսաստանի ձեռքում՝ գնալ Եվրոպա: Րաֆֆի Հովհաննիսյանն էլ ասում էր՝ պետք է ճանաչել ԼՂ անկախությունը և գնալ Եվրոպա, որը անհասկանալի էր: Պուտինը կանչեց և ասաց՝ «մենք ձեր համբալը չենք, մենք ձեզ մոտ զորք ունենք», պարզ չէ՞ր, որ այսպես էր լինելու: Վարչապետն ասում էր՝ ՄՄ հետ սահմաններ չունենք, մինչդեռ այստեղ սահմանի առկայությունը գրոշի արժեք չունի»,- ասաց նա:
Բագրատյանը համոզված է՝ եթե Հայաստանը Եվրոպայի հետ չսկսեր բանակցություններ, չէր մտնի Մաքսային միություն: Նրա խոսքով՝ Ռուսաստանի կողմից մինչև այս գարուն ոչ մի ճնշում չի եղել: ՀԱԿ պատգամավորը ցավով է նշում՝ Հայաստանը պարզապես դնում են տանկի թրթուրի տակ. ռուսների մոտ մենք չգնացինք, այլ տարան, սակայն արդեն այնտեղ էլ տպավորություն կա, որ Հայաստանը ցանկացած պահի կարող է իրենց «գցել»:
ՀԱԿ պատգամավորը կարծում է՝ Սերժ Սարգսյանը պիտի համարձակություն հավաքի, ասի, որ այնուամենայնիվ, հարցը պիտի դրվի հանրաքվեի, եթե ժողովուրդն ասի՝ այո, ընտրում եմ ՄՄ, դրանից հետո կարելի է մտածել՝ ինչ անել, որ Միությունից Հայաստանը շահի: Հայտնվել ՄՄ կազմում, որտեղ անդամ երկրներից երկուսը էներգակիրների խոշոր արտադրողներ են, երկուսը՝ ներմուծող, կնշանակի ուղղակի կործանել հանրապետությունը: «Մեզ սպասվում է ռուբլի փող. այդ արտարժույթի ներմուծումն անխուսափելի է: ՄՄ անդամակցումը կունենա թե՛ դրական, թե՛ բացասական կողմեր. կոնյակի, գինու արտադրությունը կծաղկի, սակայն, մյուս կողմից, մենք պետք է մտածենք ռուսական բիզնեսի ծավալման արդյունավետ տարբերակ: ԵՄ-ն ընտրելով՝ մենք թուրքերի հետ հայտնվելու էինք միևնույն գոտում, լրացուցիչ լծակ էինք ստանալու՝ թուրքերի վրա փնթփնթալու, թե սահմանը փակ է, կամ Եվրոպային բողոքելու համար»,- ասաց նա:
Ըստ Բագրատյանի՝ իրանական գազի ներմուծումը Հայաստան կարող է կանգնել: Եվրոպան երբեք Հայաստանին չի պատժի: Պատգամավորը դա բացառում է, քանի որ կարծում է՝ Եվրոպային օգուտ չի տա դա, քաղաքական հետևանքներ կլինեն, կուսակցությունների մեջ կսկսվի շարժում, «բոլորը կսկսեն ուսումնասիրել «Եդինայա Ռոսիա» կուսակցության ծրագիրը»: Բագրատյանի խոսքով՝ Ռուսաստանը շահեր ունի Հայաստանից, ուստի դեռ պատրաստ է գնալ զիջումների: Այնուամենայնիվ, ռուսները նախ ՄՄ կազմում կցանկանային տեսնել Ուկրաինային, հետո նոր Հայաստանին, քանի որ Հայաստանի դեպքում նաև Ղարաբաղի հարց կա:
«Եվրոպայի կողմից հարված լինելու է, արդեն կա, սակայն մենք կարող ենք մեղմացնել այն, փորձել մեզ համար առավելագույնը ստանալ»,- համոզված է Բագրատյանը: Նա նշում է, որ ՄՄ անդամակցումից հետո կնվազեն ռուսական ավտոմեքենաների գները, սակայն կթանկանան արտասահմանյան արտադրության մեքենաները, շինանյութերը և մի շարք այլ ապրանքներ:
Լուսանկարը՝ PanARMENIAN Photo-ի
