Օրեր առաջ, երբ Ֆրանսիայի նորընտիր նախագահ Էմանուել Մակրոնը հանդիպել էր իր ամերիկացի գործընկեր Դոնալդ Թրամփին, միջազգային մամուլն ու փորձագետներն արձանագրել էին նրա հավասարակշիռ, միևնույն ժամանակ` ինքնավստահ կեցվածքը:
Այս կարծիքն ավելի ամրապնդվեց երեկ` Մակրոնի և Ռուսաստանի նախագահ Վլադիմիր Պուտինի համատեղ ասուլիսի ժամանակ: Մենք չգիտենք, թե Վերսալի պալատում` փակ դռների հետևում, երեք ժամ ինչ են խոսել երկու առաջնորդները, սակայն բանակցություններին հաջորդած ասուլիսում Մակրոնը միանգամայն հանգիստ տոնով Պուտինի երեսին շպրտեց այն, ինչը շատ արևմտյան գործիչներ անում են դիվանագիտական խուճուճ ձևակերպումներով: Մակրոնը «Russia Today» և «Sputnik» ռուսական պետական լրատվական գործակալություններին մեղադրել է Ֆրանսիայի նախագահական ընտրությունների ժամանակ «կեղծ լուրեր» տարածելու և «քարոզչությամբ» զբաղվելու հարցում: Ֆրանսիայի նախագահը հավելել է, որ «Russia Today»-ն և «Sputnik»-ն «ազդեցության գործակալներ» են և «իրենց պահում են կառավարության կառույցների նման»:
Վստահաբար` Մակրոնը պատահաբար չէր ընտրել այն ձևաչափը, որտեղ հնչեցրեց, ըստ էության, Պուտինին հասցեագրված մեղադրանք, որի էությունն այն է, որ Կրեմլը զբաղվել է ինֆորմացիոն «քիլերությամբ»` նպատակ ունենալով վերահսկել, ուղղորդել Ֆրանսիայի նախագահական ընտրությունները: Մակրոնը Պուտինին «շախ» հայտարարել էր դեռ մայիսի 7-ին, երբ, ի հեճուկս ռուսական ջանքերի, համոզիչ հաղթանակ տարավ նախագահական ընտրությունների երկրորդ փուլում: Երեկ «մատը» ձևակերպելու պահն էր, երբ Մակրոնը բացահայտում էր, թե «կեղծ լուրեր» տարածողը հենց իր կողքին կանգնած Պուտինն է` թաքնված «Russia Today»-ն և «Sputnik» ֆեյքերի հետևում: Ուշագրավ է, որ երեկ Պուտինին դավաճանել էր ինքնավստահությունը, և նա ոչ թե հակադարձել է Մակրոնին, այլ, ըստ էության, անուղղակի հիմնավորել է նրա մեղադրանքը` երկար-բարակ արդարանալով, թե ընտրություններից առաջ ինչու է հյուրընկալել Ֆրանսիայի գործող նախագահի ազգայնական մրցակից Մարին Լը Պենին:
«Sputnik»-ը գործունեություն է ծավալում նաև Հայաստանում և, ըստ հավաստի լուրերի, մեր հասարակությանը «թունավորում» է ընդդիմադիր ներկայացող հայաստանցի մի օլիգարխի փողերով, որի «վզին» Կրեմլից դրված է տխրահռչակ գործակալության «կասիրությունը»: Մակրոնի համարձակ բացահայտումից ու Պուտինի խեղճ ու կրակ պատասխանից հետո` արժանապատվություն ունեցող ցանկացած հասարակություն պարտավոր է արհամարհել, բոյկոտել ռուսական պրոպագանդայի «քիլերներին»:
