Չինաստանի պաշտպանության նախարարությունը հերթական անգամ ԱՄՆ ռազմաօդային և ռազմածովային ուժերին կոչ է արել վերջ տալ Հարավչինական ծովի շրջանում սադրիչ գործունեությանը, որը սպառնալիք է ներկայացնում Չինաստանի ինքնիշխանությանը և անվտանգությանը: Այս մասին հայտնում է RIA Novosti-ն՝ վկայակոչելով գերատեսչության շաբաթ օրը հրապարակած հայտարարությունը:
«Հերթական անգամ ամերիկյան կողմին կոչ ենք անում արդյուանվետ միջոցներ ձեռնարկել հետագայում այդպիսի դեպքերից խուսափելու համար: Չինաստանի զինված ուժերը պատասխանատվությամբ կկատարեն իրենց պարտականությունները և վճռականորեն կպաշտպանեն ազգային ինքնիշխանությունը և անվտանգությունը»,- ասվում է հայտարարության մեջ:
Ավելի վաղ ամերիկյան ԶՄ-ները հայտնել էին, որ չինական երկու J-10 բազմաֆունկցիոնալ կործանիչ-ռմբակոծիչ մայիսի 25-ին Հոնկոնգի օդային տարածքից 240 կմ հարավ-արևելք մոտ 30 մ հեռավորության վրա մոտեցել են ԱՄՆ ռազմաօդային ուժերի P-3 Orion պարեկային ինքնաթիռին:
Չինաստանի պաշտպանական գերատեսչությունը հաստատեց, որ ԱՄՆ պարեկային ռազմանավը մայիսի 25-ին հետախուզական գործունեություն է իրականացրել Հոնկոնգի օդային տարածքից հարավ-արևելք:
Չինաստանի պաշտպանության նախարարությունը նշում է, որ վերջերս ամերիկացի զինվորականները մի քանի նավ և ինքնաթիռ են ուղարկել Հարավչինական ծովի շրջան, ինչը սպառնալիք է ինչպես Չինաստանի ինքնիշխանության, այնպես էլ՝ այդ շրջանում գտնվող զինվորական անձնակազմի կյանքի համար:
