ՀՀ Գլխավոր դատախազ Աղվան Հովսեփյանն այսօր հայտարարել է զբաղեցրած պաշտոնից հեռանալու մասին՝ Սահմանադրությամբ նախատեսված 6-ամյա ժամկետը լրանալու կապակցությամբ:
«Փաստինֆո»-ի փոխանցմամբ՝ իր հրաժեշտի խոսքում Ա.Հովսեփյանը նշել է, որ դատախազության համակարգում աշխատում է արդեն շուրջ 40 տարի, որից 15 տարին ղեկավարել է այդ համակարգը: «Երեք անգամ նշանակվել եմ ՀՀ գլխավոր դատախազ, շնորհակալ եմ Աստծուն, ճակատագրին, որ ինձ բախտ է վիճակվել իմ մասնագիտության բերումով զբաղեցնել այսպիսի բարձր պաշտոն, ծառայել իմ պետականությանը, Հայրենիքին: Այս տարիների ընթացքում, վկա է Աստված, արել եմ ամեն ինչ, որպեսզի համակարգը կայանա, և բոլոր խնդիրները, որ առաջադրված են եղել դատախազության համակարգի առջև, լուծվեն արդարադատության, օրենսդրության սահմաններում»,- ասել է Ա.Հովսեփյանը:
Դիմելով լրագրողներին՝ Ա.Հովսեփյանը հայտարարել է. «Շնորհակալ եմ, որ ձեր անմիջական ազդեցիկ հայացքի ներքո ես միշտ կաշկանդված աշխատել եմ, հանրային կարծիքը միշտ ի դեմս ձեզ՝ նկատի ունենալով»:
Որպես իր պաշտոնավարման արդյունք Ա.Հովսեփյանը նշել է, որ դատախազության համակարգը երեք անգամ հիմնովին բարեփոխումների է ենթարկվել, այդ թվում՝ օրենսդրական: Այսօր դատախազական համակարգը կառուցված է ու կարգավորվում է Դատախազության մասին օրենքով, որը համահունչ է միջազգային կառույցների պահանջներին: Ա.Հովսեփյանը ցանկություն է հայտնել, որ Հայաստանի հաջորդ գլխավոր դատախազը պահպանի ձեռքբերումները և հետագա բարեփոխումներով զարգացնի դատախազական համակարգը:
«Փաստինֆո»-ի հարցին, թե արդյոք ինքը ստացել է այլ պաշտոնում աշխատելու առաջարկ՝ Ա.Հովսեփյանը հայտարարել է. «Մենք դեռ միասին աշխատելու ենք»:
Ա.Հովսեփյանը հայտնել է նաև, որ իր հասարակական գործունեությունը շարունակելու է և ավելի ակտիվ: «Ցավոք սրտի, մեր հանրության մեջ թույն կաթեցնողները շատ են, օր-օրի ավելանում են, այն, ինչ ես անում եմ, ուղղակի հակաթույն է, հանրությունը թունավորելու դեմ և ամեն ինչ անելու եմ, որ մեր հասարակությունն առողջ ապրի»:
Մինչև նոր Գլխավոր դատախազի նշանակումը նրա պարտականությունները ժամանակավորապես կկատարի Գլխավոր դատախազի տեղակալ Արամ Թամազյանը:
Մանրամասները՝ «Փաստինֆո»-ում
