Վերջին տարիների ընթացքում առաջին անգամ ռուսական հեռուստաալիքներից մեկը` NTV-ն, եթեր է հեռարձակել Խոդորկովսկուն նվիրված ռեպորտաժ, որն ընդհանուր առմամբ եղել է չեզոք և ներկայացրել է նրա գործի հետ կապված վերջին մանրամասնությունները: Ընդ որում, ռեպորտաժը հեռարձակվել է ամենադիտվող ժամին հեռուստաալիքի ամենահայտնի հաղորդումներից մեկով:
Հաղորդավարը Խոդորկովսկու մասին ռեպորտաժից առաջ ասել է. «Ճշմարտությունը մեկն է, որ ում անունը հիմա կտանք, նրա նկատմամբ վերաբերմունքը փոխվում է»:
Ռեպորտաժի ժամանակ ցուցադրվել է Խոդորկովսկու վերջին հարցազրույցը ձերբակալվելուց առաջ, որտեղ նա մեղադրում է դատախազությանը հնարավոր բոլոր անօրինական մեթոդները կիրառելու մեջ: Հաղորդավարը պատմել է, որ վերջերս մտավորականների մի խումբ դիմել էր երկրի իշխանությանը հայտնի գործարարին ազատ արձակելու կոչով, սակայն նրանցից մի քանիսը հետագայում հրաժարվել էին իրենց ստորագրությունից:
Մեջբերում կար նաև նախագահ Մեդվեդևի հայտարարություններից, որոնցում նա ասում է, որ եթե բերվեն Խոդորկովսկու անմեղության մասին փաստեր, իրենք կքննեն դրանք, ինչպես նաև այն, որ լրագրողի հարցին Մեդվեդևը պատասխանել էր, թե Խոդորկովսկին «բացարձակապես վտանգավոր չէ պետության համար»: Ռեպորտաժի ժամանակ խոսել են նաև փաստաբանները, որոնք հայտարարել են, որ Խոդորկովսկին դիմելու վաղաժամկետ ազատման համար:
Հետաքրքիրն այն է, որ ռուսական մեկ այլ` «Ռոսիա» հեռուստաալիքը նույնպես տարօրինակ ռեպորտաժ է ցուցադրել, որտեղ «թույլատրվել է» հրապարակել Խոդորկովսկու` դատարանում ունեցած ելույթից մի հատված, ինչպես նաև Խոդորկովսկու փաստաբանների ելույթները:
Շատերն այս «թուլացումը» պայմանավորում են վաղը Եվրոպական դատարանում սկսվող Խոդորկովսկու գործի առաջին նիստով:
