«Առաջին լրատվական»-ի զրուցակիցն է Հրազդանի ՀՀԿ-ական քաղաքապետ Արամ Դանիելյանը։
– Պարոն Դանիելյան, այս օրերին ՀՀԿ-ական բոլոր քաղաքապետերը, այդ թվում և Դուք արձակուրդում եք։ Քաղաքապետերի և այլ պաշտոնյաների՝ համատարած արձակուրդում գտնվելը կաթվածահար չի՞ անում ՏԻՄ մարմինների աշխատանքը։
– Այո, ես նույնպես իմ հաշվին արձակուրդում եմ գտնվում, մասնակցում եմ ՀՀԿ-ի քարոզարշավին ու Սանամյան Սամվելի շտաբի պետն եմ։ Ընտրարշավը գնում է Ընտրական օրենսգրքին համահունչ, որևէ արտառոց բան չկա։ Ինչ վերաբերում է քաղաքապետերին, ապա ոչ մեկի աշխատանքը չի խաթարվել։ Համապատասխան մարդիկ փոխարինում են քաղաքապետերին, և բոլորի աշխատանքները նորմալ հունով գնում են։ Ոչ մեկի աշխատանքը կաթվածահար չի եղել։
– Պարոն Դանիելյան, ինչպե՞ս եք գնահատում ՀՀԿ-ի շանսերը Կոտայքի մարզում։ Մամուլը գրում է, որ Ձեր մարզում Ծառուկյանը հաղթանակ է տանելու, և ՀՀԿ-ի շանսերը շատ փոքր են։
– ՀՀԿ-ի շանսերը Հրազդանի տարածաշրջանում շատ մեծ են։ ՀՀԿ-ի տարածքային կառույցի ղեկավարը ես եմ և շատ լավ եմ գնահատում մեր շանսերը։ Ես որևէ տեղ չեմ կարդացել, որ Ծառուկյանի շանսերն ավելի մեծ են, քան ՀՀԿ-ինը։
– Բայց Կոտայքի մարզը մշտապես եղել է Ծառուկյանի ազդեցության տակ։ Եվ իրենք այդ մարզում մշտապես լավ արդյունք են ունեցել։
– Դուք այդ հարցերը տվեք համապատասխան անձանց։ Ես իմ տարածքի մասով կարող եմ ասել, որ Հանրապետականի շանսերն ավելի մեծ են։
– Ընդդիմադիրները ահազանգում են, որ Դուք վարչական լծակները կիրառելով՝ դպրոցների, մանկապարտեզների աշխատակիցներին ստիպում եք ձայն տալ ու ձայներ բերել ՀՀԿ-ի համար։ Ինչպե՞ս կարձագանքեք։
– Ես՝ որպես քաղաքապետ, ոչ մի լծակ չեմ օգտագործում։ Ես՝ որպես քաղաքապետ, մեր թիմը տասնյակ տարիների ընթացքում ձևավորել ենք մի թիմ, որը թե ՏԻՄ, թե համապետական ընտրություններին միահամուռ է և մշտապես լավ արդյունք է գրանցում։ Ձեր նշած դեպքերը, անձինք քարոզարշավին ներգրավվում են աշխատանքից հետո։ Դպրոցի տնօրենները, աշխատակիցները, մանկապարտեզների վարիչները նույնպես լծվում են քարոզարշավի գործին, բայց աշխատանքից հետո։ Ես բոլորին հրահանգել եմ աշխատանքի ժամին զբաղվել աշխատանքով, աշխատանքից հետո նոր միայն քարոզարշավով։
– Հրազդանում այս անգամ էլ ընդդիմության կողմից առաջադրվել է Ձեր նախկին մրցակիցը Սասուն Միքայելյանը։ Ինչպե՞ս եք ընդդիմության շանսերը գնահատում։
– Այդ հարցերը իրենց տվեք։ Եթե իրենք իրենց շանսերը բարձր են գնահատում, դա իրենց կարծիքն է։ Իսկ ես մնում եմ իմ կարծիքին։ Ամեն դեպքում մեր մարզում ամեն ինչ հանգիստ է, հանդարտ է։ Մենք ամբողջ թիմով, ռեյտինգային մեր թեկնածուները՝ բոլորը աշխատում են ՀՀԿ-ի համար, որպեսզի առավելագույն ձայներ բերեն։
– Բայց մենք տեսնում ենք, որ նույն թիմի՝ ՀՀԿ-ի ներկայացուցիչները բախվում են միմյանց, կրակոցներ են հնչում։
– Մեր մարզում ՀՀԿ-ականների միջև այդպիսի հարաբերություններ չկան։ Բոլորը շատ լավ հարաբերությունների մեջ են միմյանց հետ ու աշխատում են մեկ նպատակի համար։
Լուսանկարը՝ ArmLur.am-ի
