ՀՀ ԱԻ նախարար Դավիթ Տոնոյանը փետրվարի 22-ին ընդունեց Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Բրեդլի Բուզետոյին, Հայաստանում ՄԱԿ փախստականների հարցերով գերագույն հանձնակատարի գրասենյակի ներկայացուցիչ Քրիստոֆ Բիրվիրթին և ՄԱԿ ՓԳՀ Հարավային Կովկասի տարածաշրջանային գրասենյակի ներկայացուցիչ Յոհաննես Վան Դեր Կլաուին:Այս մասին տեղեկացրին ՀՀ արտակարգ իրավիճակների նախարարությունից:
Հանդիպման նպատակն էր քննարկել ՀՀ ԱԻՆ-ի և ՄԱԿ-ի հայաստանյան ներկայացուցչության համագործակցության ընդլայնումը բնական և տեխնածին աղետների ժամանակ բնակչության պաշտպանության, դիմակայունության մակարդակի բարձրացման , ինչպես նաև աղետների ռիսկի նվազեցման հիմնախնդիրների շուրջ:
Միջազգային գործընկերների ուշադրությունը հրավիրելով աղետներին ազգային դիմակայունության մակարդակի բարձրացման խնդիրներին՝ նախարար Տոնոյանը շեշտեց, որ աղետների ժամանակ առավել խոցելի են կանայք, երեխաները, հաշմանդամներն ու տարեցները, ուստի հարկ է առավել մեծ ուշադրություն դարձնել վերջիններիս պատրաստվածությանը ճգնաժամերին արձագանքելու հարցում:
Կողմերը կարևորեցին նաև ճգնաժամերի ժամանակ տարածաշրջանում կայունության պահպանման հիմնախնդիրը, մասնավորապես՝ աջակցությունը բնական աղետների ժամանակ բնակչության տարհանման հարցերում:
Հանդիպման ավարտին կողմերի միջև պայմանավորվածություն ձեռքբերվեց համատեղ ծրագրեր մշակել աղետների ռիսկի նվազեցման և բնակչության պաշտպանության ու դիմակայունության բարձրացման բնագավառներում:
