Ազգային ժողովի ՀԱԿ խմբակցության քարտուղար Արամ Մանուկյանը փետրվարի 21-ին կայացած ասուլիսին անդրադառնալով ընտրություններից առաջ ընթացող ներքաղաքական զարգացումներին՝ նշեց, որ սկզբում այնպիսի տպավորություն է ունեցել, թե շատ քաղաքական գործիչներ և կուսակցություններ ցանկանում էին իշխանության հասնել ցանկացած գնով և այդ սկզբունքով դաշինքները ձևավորեցին:
«Ո՞ւմ հետ, ո՞նց, ի՞նչ պայմանով, ի՞նչ սկզբունքով` կապ չուներ: Բոլորը մխրճվում էին, հետո հասկացան, որ արհեստական վինեգրետը չի ձգում, սկսեցին դուրս գալ, հետո փորձեցին ուրիշ կոալիցիաներ մտնել: Ես դա ամենաբացասական բանն եմ համարում, որ չկար սկզբունք, այլ ուղղակի նպատակ` հայտնվել խորհրդարանում, որտեղ 60 տոկոսը ոչինչ չի անում», – ասաց նա և նկատեց, որ ԱԺ-ում կան մարդիկ, ովքեր նույնիսկ կոճակի տեղը չգիտեն»:
Արամ Մանուկյանի դիտարկմամբ՝ անորակ, անգրագիտության խորհրդարան տանելու շքերթն ավելի է շատացել: «Ամբողջ քաղաքական դաշտը զբաղված է մեյմունությամբ: Մորեխի նման թռնում են տեղից տեղ, միայն թե հայտնվեն այդ աթոռում», – ասաց նա և նշեց, որ գաղափարական հայտեր չեղան:
Ըստ ՀԱԿ խմբակցության քարտուղարի՝ քաղաքական ուժերը չեն ներկայացնում, թե ինչպիսի զարգացում են պատկերացնում: «Միակը, որ բժշկի կեցվածքով դառը անալգին է առաջարկում քաղաքացիներին, Հայ Ազգային Կոնգրեսն է»,- նշեց Մանուկյանը:
Մանրամասները՝ տեսանյութում:
