«Առաջին լրատվական»-ի զրուցակիցն է գրող, քրեագետ Սերգեյ Գալոյանը:
– Պարոն Գալոյան, օրերս Մոսկվայի «Դոմոդեդովո» օդանավակայանում, սահմանային ստուգում անցնելիս ձերբակալվեց քրեական աշխարհում հայտնի «օրենքով գող» է Արտյոմ Լիպեցկին՝ Արտյոմ Առաքելյանը, ով համարվում էր Դեդ Հասանի հանցախմբի անդամներից մեկը: Ի՞նչ կասեք այս ձերբակալության մասին: Կարելի՞ է արդեն ասել, որ Դեդ Հասանի սպանությունից հետո Ռուսաստանի իշխանությունները որոշել են վերջնականապես մեկուսացնել վերջինիս բոլոր զինակիցներին:
– Նախ ասեմ, որ նրա մականունը Լիպեցկ է, որովհետև մեծացել է Լիպեցկի մարզում: Արտյոմ Լիպեցկուն ձերբակալել են տեղի քաղաքներից մեկի «նայողի» սպանության մեջ կասկածանքով, սակայն դեռևս հայտնի չէ՝ նա կապ ունի՞ այդ սպանությանը, թե՞ ոչ: Նրան ձերբակալեցին Անթալիայից Մոսկվա վերադառնալու ժամանակ: Ասեմ, որ 34-ամյա այս հայի ձերբակալության համար մեծ աղմուկ բարձրացրին առաջին հերթին այն մարդիկ, ովքեր այս աշխարհին ծանոթ չեն, հատկապես ռուսական լրատվամիջոցները անընդհատ շեշտում են նրա հայ լինելու հանգամանքը և չեղած տեղից մեծ աղմուկ բարձրացնում: Արտյոմ Առաքելյանը «թագադրվել» է անցյալ տարի, շատ հարգված մարդ է, բայց այնպես չէ, որ առաջնորդներից է, պարզապես կրիմինալ աշխարհն ամենաընթերցվողն է այժմ, դրա համար էլ աղմուկ են բարձրացրել:
– Մեզ հետ զրույցում Դուք նշել էիք, որ հետխորհրդային երկրների քրեական միջավայրում, «օրենքով գողերի» շրջանում վերադասավորումներ, փոփոխություններ են լինում, որ առկա է լարվածություն: Հնարավո՞ր է, որ Արտյոմ Լիպեցկու ձերբակալությունը ևս այդ շրջանակում է:
– Արտյոմ Առաքելյանին և հայերից ևս մեկին անցյալ տարի հոկտեմբերի 25-ին Մոսկվայի ռեստորաններից մեկում էլի ձերբակալել էին, պատճառը թմրանյութի առկայությունն էր: Նման կերպ ձերբակալելը սովորույթ է դարձել ռուսական իրավապահ մարմինների համար, նրանք թմրանյութ են գցում քրեական աշխարհի ներկայացուցչի գրպանը և ձերբակալում, սակայն դա շատ թույլ տարբերակ է արդեն: Այժմ նրան նորից ձերբակալել են: Սա Դեդ Հասանի և Տարիել Օնիանի միջև հակամարտության հետևանք է: Անկախ այն բանից, որ Դեդ Հասանը այլևս ֆիզիկապես գոյություն չունի, դեռևս նրա իշխանությունն ակնհայտ է քրեական աշխարհում: Վիճակը կխաղաղվի այն ժամանակ, երբ գա Դեդ Հասանի հավանական հետևորդը՝ Շաքրո Մալադոյը, ով այժմ Իսպանիայի բանտերից մեկում է, և շուտով կավարտվի նրա բանտարկության ժամկետը: Երբ նա գա, նորից լարվածությունը կսրվի, սակայն ամեն ինչ կհանդարտվի: Յոթ ամիս է, ինչ Դեդ Հասանը սպանվել է, և դրանից հետո 126 մարդ է սպանվել, դա դեռ ինձ հայտնի թիվն է:
– Կարելի՞ ենթադրել, որ քրեական աշխարհում պարբերաբար առաջին պլան մղվող հակամարտությունների և լարվածության արդյունքում քրեական աշխարհը թուլացել է:
– Քրեական աշխարհը շատ լուրջ է, շատ երկրների իշխանություններ թերագնահատեցին այն և դրա համար էլ մինչ օրս կախված են դրանից: Այս հակամարտությունները չեն թուլացնի քրեական աշխարհը, պարզապես ամեն ինչ իրենց տեղը կդնեն: Եթե կրիմինալի մասին ճիշտն են ուզում իմանալ, պետք է մի փոքր վերանալ հայկական սերիալներում ներկայացվող գողերի ու որբերի կերպարներից, որոնք պարզապես իմիտացիոն բաներ են՝ արված մանկամիտների համար:
– Հայաստանյան իրականության մեջ քրեական տարրը, որպես կանոն, ակտիվանում է ընտրությունից ընտրություն:
– Ճիշտ եք, ընտրության ժամանակ կրիմինալն է աշխատում, սակայն այդպես չէր լինի, եթե օրենքը իր տեղն ունենար: Եթե այսպես շարունակվի, կրիմինալը անգամ դպրոցի տնօրեն նշանակելիս կխառնվի, և սա անհանգստացնող է: Մենք սևեռվել ենք մի հարցի վրա՝ մեր ամենամեծ իրադարձությունը համարում ենք ընտրությունները՝ սկսած նախագահականից, վերջացրած ինչ-որ գյուղի գյուղապետի ընտրությամբ: Սա ծիծաղելի է, կարևոր չէ՝ ով է նստելու աթոռին, կարևոր է՝ ինչ է անելու, ինչպես է աշխատելու: Իսկ մենք տեսնում ենք, որ արտագաղթն այժմ հասել է ահռելի չափերի: Եթե օրենքը գործի, կրիմինալն իր տեղը կունենա, օրենքը՝ իր, և մեկը մյուսին չեն խառնվի:
