Մոլորակի բոլոր երկրների պարտքն է առանց միջուկային զենքի աշխարհը կառուցելը: Նման հայտարարությամբ է այսօր՝ Նագասակի քաղաքի ռմբակոծման 68-րդ տարելիցի կապակցությամբ, հանդես եկել Ճապոնիայի վարչապետ Սինձո Աբեն: Այս մասին հայտնում է ITAR-TASS-ը:
Նա կրկին հաստատել է «աշխարհն առանց միջուկային զենքի» Տոկիոյի սկզբունքը, որը երեք բաղադրիչ ունի՝ չունենալ, չարտադրել և սեփական տարածքում չպահել միջուկային զենք: Նա կոչ է արել ողջ աշխարհին հիշել Նագասակիի ատոմային ռմբակոծման դասերը:
Առանց միջուկային զենքի աշխարհը կառուցելու կոչ է արել նաև Նագասակիի քաղաքապետ Տոմիհիսա Տաուեն։ «Աշխարհում դեռևս գոյություն ունի ավելի քան 17 հազար միջուկային մարտագլխիկ: Դրանց 90 տոկոսը պատկանում է ԱՄՆ-ին ու Ռուսաստանին: Խնդրում եմ՝ շտապ և վճռականորեն կրճատեք մարդագլխիկների թիվը»,- ասել է Տաուեն՝ դիմելով երկու երկրների ղեկավարներին:
Այսօր քաղաքի Խաղաղության զբոսայգում անցկացվում են հիշատակի արարողություններ:
Օգոստոսի 6-ին հիշատակի արարողություններ են անցկացվել Հերոսիմայում:
