Եվրոպական վիճակագրական Eurostat ծառայությունը ներկայացրել է 2013 թվականի առաջին եռամսյակում ԵՄ երկրներում ապաստանի ստացման խնդրանքով դիմումների վիճակագրությունը: Այս մասին տեղեկանում ենք բյուրոյի պաշտոնական կայքից:
Հայաստանը դիմումների թվով 21-րդ տեղում է: ԵՄ երկրներում ապաստան ստանալու խնդրանքով 2013-ի հունվար-մարտ ամիսներին ներկայացվել է 1355 դիմում: Դիմումների 48 տոկոսը տրվել է Ֆրանսիայում, 18 տոկոսը՝ Գերմանիայում, 9 տոկոսը՝ Բելգիայում, 6 տոկոսը՝ Լեհաստանում, 5 տոկոսը՝ Շվեդիայում ապաստան ստանալու համար։
Դիմումների 20.8 տոկոսը բաժին է ընկնում մինչև 13 տարեկաններին, 4.9 տոկոսը կազմում են 14-17, 39.9 տոկոսը՝ 18-34 տարիքային խմբերի ներկայացուցիչները, 32 տոկոսը 35-64 տարեկան, իսկ 3 տոկոսը՝ 65-ից բարձր տարիքի անձինք են:
2012-ի առաջին եռամսյակում հայաստանցիների կողմից ԵՄ երկրներ ներկայացվել է 1550 դիմում: 2012-ի նույն ժամանակահատվածի համեմատ՝ 2013-ի առաջին երեք ամիսներին դիմումների թիվը նվազել է 12 տոկոսվ, իսկ 2012-ի վերջին եռամսյակի համեմատ՝ 11 տոկոսով: Ընդհանուր առմամբ՝ 2012-ին հայաստանցիները 5520 դիմում են ներկայացրել:
2013-ի հունվար-մարտ ամիսներին Ռուսաստանի քաղաքացիների կողմից ստացվել են ԵՄ երկրներում ապաստանի տրամադրման հայցով ամենամեծ թվով դիմումները:
Eurostat-ի տվյալներով՝ ընթացիկ տարվա առաջին երեք ամիսներին ԵՄ-ում փախստականի կարգավիճակ է շնորհվել 8435 ռուսաստանցու (անցած տարվա համեմատ` 4000-ով ավելի): Նրանց կեսը մինչև 18 տարեկան են:
Ներկայացված դիմումների թվաքանակով երկրորդ տեղում Սիրիայի քաղաքացիներն են (8395 մարդ): Նրանց հաջորդում են աֆղանները (5 880), պակիստանցիները (4 310) և սոմալեցիները (3 430):
8-րդ տեղում մեր հարևան Իրանն է (3265): Վրաստանը 11-րդ տեղն է զբաղեցնում (2315), Թուրքիան՝ 17-րդ (1660), Ադրբեջանը՝ 30-րդ (650):
Eurostat-ի տվյալներով՝ընդհանուր առմամբ 2013-ի հունվար-մարտ ամիսներին երրորդ երկրների քաղաքացիների կողմից ստացվել է ապաստանի տրամադրման մասին 85 հազար միջնորդություն, ինչը 15 հազարով ավելի է անցած տարվա առաջին եռամսյակի համեմատ:
ԵՄ երկրների շարքում 2013-ի առաջին եռամսյակի տվյալներով՝ ապաստանի ստացման վերաբերյալ դիմումների 25 տոկոսը բաժին է ընկել Գերմանիային:
Հավելենք, որ 2012-ին ընդհանուր առամամբ ԵՄ երկրներում գրանցվել է ապաստանի տրամադրման 332 հազար դիմում:
