Հայտնի է դարձել, որ Հարավային Կովկասում Ռուսաստանի և Հայաստանի զորքերի միջև միացյալ խմբավորում է ստեղծվելու, նշվում է, որ խմբավորման ղեկավարը ենթարկվելու է ՀՀ ԶՈւ Գլխավոր շտաբի պետին, բայց պատերազմի դեպքում նախապատվությունը կարող է տրվել Ռուսաստանի Հարավային օկրուգի հրամանատարին:
Թեմայի շուրջ «Առաջին լրատվական»- ի հետ զրույցում անդրադառնալով հարցին, թե հայ-ռուսական համագործակցության և տարածաշրջանային անվտանգության առումով ինչ հետևանքներ կարող է ունենալ այս քայլը, ՌԱՀՀԿ տնօրեն, քաղաքագետ Մանվել Սարգսյանը նշեց, որ ինֆորմացիան հակասական է, և պարզ չէ, թե ինչ միավորում է լինելու:
«Ինչ վերաբերում է նրան, թե ինչպես են որոշումներ ընդունում և ինչպես է դա կազմակերպվում, դա լրջագույն հարցն է, որովհետև երբ որ ՀՕՊ միասնական համակարգ ստեղծվեց, այդ ժամանակ էլ այդ հարցերը կային և հասկանալի չէր, թե ի վերջո ինչպես պետք է գործեն այդ միավորումները:
Էական է այն, որ նախատեսվում է, որ խաղաղ պայմաններում և պատերազմի ժամանակ այլ կերպ է ղեկավարվելու, և պատերազմի ժամանակ նախապատվություն է տրվելու ռուսական կողմին, սակայն թվում, է թե հակառակը պիտի լիներ, ամեն ինչ պետք է այդ ժամանակ Հայաստանի ձեռքին լինի և մյուսներն էլ աջակցեն: Բայց մենք այսպիսի անհասկանալի բան ենք լսում. այսինքն՝ ստացվում է, որ պատերզամական վիճակում Հայաստանը ավելի էական է դառնում Ռուսաստանի համար, և որոշումներն իրենք պիտի ընդունեն: Սա կարող է մտահոգել:
Անդրադառնալով հարցին, թե սա կարող ենք համարել Ռուսաստանի ներխուժման և իր ներկայությունը Հարավային Կովկասում ամրապնդելու փորձ, Մ. Սարգսյանը պատասխանեց. «Ամեն ինչ շատ պարզ է, Ռուսաստանն ունի իր հարաբերությունները Թուրքիայի և Ադրբեջանի հետ, և Ռուսաստանի համար այդ հարաբերություններն են կարևոր: Հայաստանն ընդամենը գործընկեր է, սուբյեկտ որի միջոցով Ռուսաստանը կարգավորում է Թուրքիայի և Ադրբեջանի հետ հարաբերությունները: Հայաստանը կարծես թե ինքն է Ռուսաստանին այդ կարգավորելու հնարավորությունը տալիս: Բայց այստեղ չկա մյուս կողմը՝ ինչքանո՞վ է դա համապատասխանում մեր ազգային շահին: Այնպես չլինի, որ մեր հաշվին Ռուսաստանն իր հարցերը լուծի…»:
Մանրամասները՝ տեսանյութում:
