Մարզային այցի շրջանակներում վարչապետ Կարեն Կարապետյանը այցելել է Սյունիք: Լեռնային Ղարաբաղի Հանրապետություն աշխատանքային այցից առաջ Գորիսում հանդիպել է Սյունիքի մարզի համայնքների ղեկավարներին։ Հանդիպմանը ներկա չի եղել նախկին մարզպետ Սուրիկ Խաչատրյանը: «Ժամանակ»-ի տեղեկություններով՝ Սյունիքի նախկին մարզպետ Սուրիկ Խաչատրյանին հստակ հրահանգ է տրված եղել վարչապետի աչքին չերևալ։ «Առաջին լրատվական»-ը Սուրիկ Խաչատրյանից փորձեց պարզել, թե ինչու ներկա չի եղել հանդիպմանը և արդյոք տեղյա՞կ է, որ վարչապետը հրահանգել է, որ նա ներկա չգտնվի: Ի պատասխան՝ Սուրիկ Խաչատրյանը զարմացավ. «Քեզանից բաներ մի հորինի», ապա անջատեց հեռախոսը՝ այդպես էլ չպատասխանելով, թե ինչու ներկա չի եղել հանդիպմանը:
Գորիս համայնքի ղեկավար Վաչագան Ադունցը ոգևորված է վարչապետի այցից: «Առաջին լրատվական»-ի հետ զրույցում նշեց, որ այցը ոչ միայն հուսադրող էր, այլ նաև ոգևորող, պարտավորեցնող: Վ. Ադունցը համոզված է, որ համատեղ ուժերով առաջիկայում լավ արդյունք են գրանցելու. «Այս պահին զբաղված ենք համայնքի կազմավորման գործերով, առաջիկայում կլինի նաև համայնքի զարգացման հնգամյա ծրագիրը, նաև մեր օրախնդրի հարցը փորձելու ենք կարգավորել: Խոշոր հաշվով, Գորիս համայնքը քաղաքի պարագայում զարգացման հիմնական ուղղությունն էր ընտրել զբոսաշրջությունը, և փորձում ենք զարգացնել ՏՏ ոլորտը»,- ասաց համայնքի ղեկավարը: Գյուղական համայնքներում ծրագրում են զարգացնել նաև գյուղատնտեսության ոլորտը, համայնքի ղեկավարի խոսքերով՝ «Հիմնական ուղղություններ ընտրել ենք զբոսաշրջությունը, գյուղատնտեսությունը և ՏՏ ոլորտը»:
Վաչագան Ադունցը դժվարացավ պատասխանել, թե ինչու ներկա չէր նախկին մարզպետը. «Չեմ կարող այս հարցը վերլուծել և պատասխանել, որովհետև ինքս հրավիրված էի միջոցառմանը, և ձևաչափին տեղյակ չեմ, համենայն դեպս մարզպետների փոփոխությունները համայնքի աշխատանքների վրա պետք է գնահատվի համապատասխան փոփոխություններ կատարողների կողմից: Ով ինչ հրահանգ է տվել, ես չգիտեմ: Մենք մեր աշխատանքը կատարում ենք համատեղ, և համոզված եմ, որ կատարելու ենք լավ, և բնակիչները պետք է որ գոհ լինեն մեր աշխատանքից»,- ասաց նա:
Հարցին՝ արդյո՞ք անհրաժեշտություն կար Սյունիքի մարզպետի փոփոխության, քաղաքապետը խորհուրդ տվեց հարցնել փոփոխություններ իրականացնողներին. «Ինձ մի հարցրեք: Մենք նախկին մարզպետի հետ էլ, ներկայիս մարզպետի հետ էլ համագործակցել և շարունակում ենք համագործակցել»:
Մարզում մարզպետի հեռանալուց հետո լարվածություն չկա, բարոյահոգեբանական մթնոլորտը լավ է: Արդյոք տխրե՞լ են մարզպետի պաշտոնանկությունից հարցին՝ Վաչագան Ադունցը պատասխանեց մի փոքր վրդովված. «Ես խնդրում եմ այդ հարցը անընդհատ մի տվեք՝ նախկին մարզպետ, նոր մարզպետ, մենք մեր աշխատանքը կատարում ենք, յուրաքանչյուրն իր գործն է կատարում համայնքում, որ ունենանք շատ ավելի լավ համայնք, շատ ավելի լավ պետություն»:
