Ադրբեջանական Trend լրատվական գործակալության փոխանցմամբ՝ Ադրբեջանում Թուրքիայի դեսպան Էրքան Օզորալը լրատվամիջոցի հետ զրույցում հայտարարել է, որ Թուրքիան մտադիր է մինչև 2023 թվականը Ադրբեջանի հետ ապրանքաշրջանառության ծավալը հասցնել մինչև 15 միլիարդ դոլարի։
Դիվանագետի խոսքերով՝ դա Թուրքիայի ամենագլխավոր նպատակներից է. «Վերջին 25 տարում՝ սկսած Ադրբեջանի անկախություն ձեռք բերելուց, մենք օրեցօր ամրապնդում ենք այդ կապերը։
Այդ 25 տարում Թուրքիան ու Ադրբեջանը համատեղ իրականացրել են «Բաքու-Թբիլիսի-Էրզրում» գազատարի և «Բաքու-Թբիլիսի-Ջեյհան» նավթամուղի նախագծերը։
Այժմ մեր առաջադրանքը այնպիսի նախագծերի իրագործումն է, ինչպիսիք են «Բաքու-Թբիլիսի-Կարս» երկաթուղին և «Անդրանատոլիական» գազատարը։ Մենք պետք է ամենակարճ ժամանակում ավարտենք այդ ուղղությամբ աշխատանքներն ու շահագործման հանձնենք այդ օբյեկտները»։
2016 թվականի հունվար-սեպտեմբերին Թուրքիայի ու Ադրբեջանի միջև ապրանքաշրջանառության ծավալը կազմել է 1.67 միլիարդ դոլար։
