Իսրայելի վարչապետ Բենյամին Նեթանյահուն, ով երեկ բանակցություններ է անցկացրել ԱՄՆ նախագահ Բարաք Օբամայի հետ, հայտարարել է, որ իր երկիրը համաձայն է պաղեստինցիների հետ փոխզիջումային հաշտության գնալ, սակայն 1967թ. սահմանների վերականգնման մասին խոսք լինել չի կարող: Այս մասին նա ասել է լրագրողներին` Բարաք Օբամայի ներկայությամբ, որը մայիսի 20-ին ներկայացրել էր ԱՄՆ մերձավորարևելյան նոր քաղաքականությունը` առաջարկելով որպես իսրայելա-պաղեստինյան հաշտեցման տարբերակ 1967թ. սահմանների վերականգնումը, ինչը ենթադրում է իսրայելական շատ բնակավայրերի հանձնում Պաղեստին պետությանը:
«Թեպետ Իսրայելը պատրաստ է փոխզիջումների, սակայն չի կարող հետ քաշվել 1967թ. սահմաններին, քանի որ կմնա անպաշտպան», ասել է Նեթանյահուն` Օբամային վստահեցնելով, որ Իսրայելը խաղաղություն է ուզում: Նա վերահաստատել է իսրայելական կառավարության նախկինում արած հայտարարությունը, որ Պաղեստինի ղեկավարությունը պետք է ընտրություն կատարի` կա՛մ ՀԱՄԱՍ-ի հետ համագործակցությունը, կա՛մ Իսրայելի հետ խաղաղությունը:
Մինչդեռ պաղեստինյան իշխանությունների ներկայացուցիչները քննադատության են ենթարկել Նեթանյահուի նման դիրքորոշումը Օբամայի առաջարկությունների վերաբերյալ: ՀԱՄԱՍ-ի ներկայացուցիչ Սամի Աբու Զուհրին ասել է, որ Նեթանյահուի հայտարարությունները ապացուցում են բանակցությունների վրա հույս դնելու անհեռանկարությունը:
Իսրայելի կողմից հրաժարումը վերադառնալու 1967թ. սահմաններին և պաղեստինյան օկուպացված տարածքներից զորքերի դուրսբերման մերժումը, ըստ ՀԱՄԱՍ-ի, ապացուցում է «բանակցությունների անհեթեթությունը, իսկ բանակցությունների վրա, որպես կարգավորման հնարավորություն, շեշտը դնելը սխալ է»:
«Այս հայտարարությունները վկայում են, որ նա (Նեթանյահուն.- 1in.am) պատրաստ չէ խաղաղության հաստատմանը, որը հիմնված է արդարության և միջազգային իրավունքի վրա», ասել է Պաղեստինի ազգային ինքնավարության ղեկավարի մամուլի խոսնակ Նաբիլ Աբու Ռուդեյնան:
