Թուրքական T24 առցանց թերթի փոխանցմամբ՝ Թուրքիայում որոշակի դժգոհություններ է առաջացրել նախագահ Ռեջեփ Էրդողանի այն հայտարարությունը, որում նա դատապարտել է 1923 թվականին կնքված Լոզանի պայմանագիրը, որով Հունաստանին են տրվել Էգեյան ծովում գտնվող մի շարք կղզիներ։
Էրդողանի այդ հայտարարությանն արձագանքել է պաշտոնաթող գնդապետ Ումիթ Յալըմը՝ ընդգծելով, որ Լոզանի ամենամեծ հաղթողը Թուրքիայի Հանրապետությունն է:
«Այս իշխանությունը նախ թող պատասխան տա, թե ինչու է Հունաստանին անցել 17 կղզի։ Զավթումը սկսվեց 2004 թվականին։ Էրդողանն ու ԱԶԿ կառավարությունը 2004 թվականից սկսել են հայրենիքի հողերը հանձնել հույն զինվորներին։ Այդ ամենն արվել է՝ հասնելու համար, որ մեկնարկեն ԵՄ-ին Թուրքիայի անդամակցության վերաբերյալ բանակցությունները։
Մեկ այլ տեսակետի համաձայն՝ այդ կղզիները Հունաստանին տրվել են որպես 1955 թվականի սեպտեմբերի 6-7-ի դեպքերից (հույների ջարդեր) հետո Թուրքիայից գաղթած հույների գույքի դիմաց փոխհատուցում։
Հունաստանին տրվեց 17 կղզի, որոնք ներառված էին Իզմիրի, Այդընի ու Մուղլայի նահանգների սահմաններում։ Դա Թուրքիայի Հանրապետության պատմության մեջ խոշորագույն տարածքային կորուստն է։ ԱԶԿ կառավարությունը Էգեյան ծովի վերահսկողությունը հանձնեց Հունաստանին»,- հայտարարել է նա։