Թուրքական Anadolu լրատվական գործակալության փոխանցմամբ՝ Թուրքիայի արտգործնախարար Մևլյութ Չավուշօղլուն Նյու Յորքում մասնակցել է փախստականների ու ներգաղթյալների խնդիրների վերաբերյալ գագաթնաժողովին, որն անցկացվել է ՄԱԿ ԳԱ-ի նստաշրջանի շրջանակներում:
Չավուշօղլուն միջազգային հանրությանը կոչ է արել վերջ դնել փախստականների հանդեպ ռասիստական ու իսլամատյաց հռետորիկային. «Ծայրահեղականությունը միայն նպաստում է խնդրի խորացմանը, ահաբեկչության խթանմանը: Արևմտաեվրոպացի քաղաքական գործիչները պետք է զգոն լինեն՝ ինչպես երբեք:
Թուրքիան գտնվում է չվերահսկվող ներգաղթի հենց էպիկենտրոնում: Ներկայումս Թուրքիայի տարածքում կա մոտ 3 միլիոն փախստական: Մեր ջանքերի շնորհիվ հաջողվել է վերջին 6 ամսում 95 տոկոսով կրճատել Էգեյան ծովով ապօրինի ներգաղթյալների հոսքը:
Թուրքիան սիրիացի փախստականների վրա ծախսել է 12 միլիարդ դոլար, մինչդեռ միջազգային հանրության ներդրումը կազմել է միայն 512 միլիոն դոլար:
Մենք կշարունակենք անել այդ ոլորտում մեզանից կախված ամեն ինչ, սակայն պետք է ընդունել ստեղծված իրավիճակի անարդար լինելը: Թուրքիան միայնակ է դիմակայում փախստականների հոսքին»:
