Независимая газета-ի փոխանցմամբ, երեկ հայտնի է դարձել, որ 4 սենատորներ` Ջոն Կայլը, Մարկ Կիրկը, Ջոն Բարասոն և Ջին ԴեՄինտը, նամակ են հղել Պենտագոնին` պահանջելով իրենց ծանուցել Վրաստանում կամ Հայաստանում ամերիկյան հակահրթիռային պաշտպանության (ՀՀՊ) համակարգերի տեղակայման կոնցեպցիայի մանրամասների մասին:
Ամերիկյան ՀՀՊ գործակալության բարձրաստիճան ներկայացուցիչը նրանց հայտնել է, որ Վրաստանում և Հայաստանում ռադիոտեղորոշիչ կայանի (ՌՏԿ) տեղակայումն էական առավելություններ կընձեռի ԱՄՆ ՀՀՊ-ին:
«Ֆրանս Պրեսս» գործակալությունը հաղորդում է, որ ամերիկյան սենատորներն այժմ Պենտագոնից պահանջում են ներկայացնել այն բոլոր աշխատանքային նյութերը, որոնք ռուսների հետ քննարկման առարկա են հանդիսացել: Խոսքը նաև ՀՀՊ-ի գծով համագործակցության շուրջ համաձայնագրի (MDCA) և պաշտպանական տեխնոլոգիական համագործակցության շուրջ համաձայնագրի (DTCA) մասին է:
Վրաստանում կամ Հայաստանում ամերիկյան ՌՏԿ-ի տեղակայումը կարևորվում է Իրանին հնարավորինս մոտ գտնվելու հանգամանքով: Առավել վաղ վրացական կողմը հայտարարել էր, որ պատրաստ է դիտարկել ՌՏԿ-ի տեղակայումն իր տարածքում, ինչն առաջացնելու է Ռուսաստանի խոր դժգոհությունը:
Այդ պատճառով էլ ԱՄՆ-ը ՌՏԿ-ի տեղակայման համար այժմ համոզում է ՆԱՏՕ-ի անդամ Թուրքիային: Այս դեպքում ՌՏԿ-ն առավել արդյունավետ կլինի, քանի որ այն առավել մոտ կգտնվի Իրանին, քան Վրաստանի պարագայում:
Քաղաքական տեսանկյունից Վրաստանում ամերիկյան ՌՏԿ-ի տեղակայումը վնասակար է Ռուսաստանի համար, սակայն նույնը չի կարելի ասել ռազմա-տեխնիկական տեսանկյունից: Բայց եթե ԱՄՆ-ը, ՌՏԿ-ի հետ մեկտեղ, Վրաստանում տեղակայի «Ստանդարտ» համակարգերը, դա արդեն լրիվ այլ հարց է:
Ներկայումս դրանց հեռահարությունը կազմում է 300 կիլոմետր, ինչը կարող է սպառնալիք հանդիսանալ Աբխազիայում ու Հարավային Օսիայում ռուսական բազաների (ինքնաթիռների) համար, իսկ ահա հեռանկարում դրանց հեռահարությունը հասցվելու է 1000 կիլոմետրի:
ՀԱՊԿ անդամ Հայաստանում ամերիկյան ՌՏԿ-ի տեղակայումը շատ քիչ հավանական է:
