Եգիպտոսի նախկին նախագահ Մուհամմադ Մուրսիի կողմնակիցները չեն բանակցի երկրի նոր իշխանությունների հետ և մտադիր են մոտակա ժամանակներս ամբողջությամբ «կաթվածահար անել» Եգիպտոսը, եթե բանակը չվերադարձնի «առևանգված» Մուրսիին և պետության ղեկավարի աթոռը: Բողոքի ցույցերը խաղաղ կլինեն՝ RIA Novosti-ին հայտարարել է «Մուսուլման եղբայրներ» շարժման քաղաքական թևի՝ «Ազատություն և արդարություն» կուսակցության նախագահի տեղակալ Իսամ Արյանը:
Արյանի խոսքերով՝ զինվորական հեղաշրջման դեմ հանդես են գալիս ոչ միայն իսլամիստները, այլ նաև բոլոր նրանք, ովքեր կարծում են, որ իրենցից գողացել են հեղափոխությունը և օրինականությունը:
Արյանը նշել է՝ եթե բանակը չվերադարձնի ժողովրդավարական կերպով ընտրված նախագահ Մուրսիին իր պաշտոնին, իրենք առաջիկա օրերին ստիպված կլինեն դիմել ծայրահեղ միջոցների: Նրա խոսքերով՝ Մուրսիին մեկուսացնելը «բոլոր միջազգային օրենքներով համարվում է առևանգում, քանի որ նրա գտնվելու մասին շուրջ երկու շաբաթ է՝ ոչինչ չգիտեն նույնիսկ նրա մոտ հարազատները»:
Արյանը նաև նշել է, որ «Մուսուլման եղբայրները» ոչ մի դեպքում չի մասնակցի բանակցություններին և քաղաքական գործընթացին, որն առաջարկել են նոր իշխանությունները, քանի որ դրանով կապացուցվի, թե տեղի ունեցած ռազմական հեղաշրջումն օրինական է:
Նրա կարծիքով՝ Մուրսիի տապալման պատճառներից մեկը Արևմուտքի երկրների և Պարսից ծոցի մի շարք միապետությունների «մեծ դավադրությունն է»:
«Դա, այսպես կոչված, միջազգային հանրության ծրագիրն է, որը ղեկավարում է աշխարհը: Դրա համաձայն՝ Եգիպտոսը պետք է լինի Պարսից ծոցի պետությունների, Եվրոպայի և ԱՄՆ-ի ինքնիշխանության ներքո»,- ասել է նա և հավելել, որ Մուրսին ունեցել է իր «ճանապարհային քարտեզը», որը նախատեսում է ակտիվ համագործակցություն և լավ հարաբերություններ այլ երկրների հետ, ինչպիսիք են՝ Ռուսաստանը, Բրազիլիան, Չինաստանը, Հարավային Աֆրիկան և Իրանը:
